भांगरभूंय | प्रतिनिधी
गोंय खंडपिठाचो आदेश: 14 मार्च मेरेन प्रतिज्ञपत्र सादर करपाचे निर्देश
भांगरभूंय । प्रतिनिधी
पणजीः वागातोरा 28 ते 30 डिसेंबर 2022 ह्या दिसांनी ‘सनबर्न’ इलेक्ट्रॉनीक डान्स, म्युझीक महोत्सव आयोजीत केल्लो. ह्या महोत्सवाक परवानगी दिवपाची प्रक्रिया कशी केल्ली, ते भायर हाका खंयचे अधिकारी जापसालदार आशिल्ले, ताची पुराय म्हायती प्रतिज्ञापत्रा वरवीं सादर करात, असो आदेश मुंबय उच्च न्यायालयाच्या गोंय खंडपिठान गोंय राज्य प्रदुशण नियंत्रण मंडळ (जीपीसीबी) आनी बार्देस उपजिल्होधिकाऱ्याक दिला. तशेंच मुख्य सचिवाक अंतीम अहवाल सादर करपाक सांगला.
ह्या प्रकरणांत रमेश सिनारी हांणी खंडपिठांत जनहीत याचिका दाखल करून ‘सनबर्न’ इलेक्ट्रॉनीक डान्स, म्युझीक महोत्सवाच्या आयोजकांनी आवाज प्रदुशणाचे नेम मोडिल्ल्याचो दावो केला. याचिकेंत तांणी राज्य सरकार, पर्यटन संचालक, उत्तर गोंय जिल्होधिकारी, उपजिल्होधिकारी, प्रदुशण नियंत्रण मंडळाचे वांगडी सचीव, उपविभागीय पुलीस अधिकारी, हणजूणें पुलीस निरिक्षक आनी स्पेसबावंड वॅब प्रा. लि. हांकां प्रतिवादी केल्यात.
इलेक्ट्रॉनीक डान्स म्युझीक महोत्सव जातलो अशी म्हायती मेळ्ळे उपरांत याचिकादारान संबंदितां कडेन पत्रवेव्हार केलो. आवाज प्रदुशण नेमा प्रमाण संगिताचो आवाज 55 डेसिबल्सा खाला दवरपाच्या निर्देशाक पाळो दिवपाची मागणी केल्ली. ते प्रमाण खंडपिटान आदेश जारी करून महोत्सव वाठारांत महोत्सवाचे सुवाचेर आवाजाची तिव्रता मेजपा खातीर यंत्रणा उबारून अहवाल सादर करपाक सांगिल्लें. खूब खेपे महोत्सवाचे सुवातेर संगिताचो आवाज 55 डेसिबल्सा परस चड आशिल्लो. ते भायर एक- दोनदां 94, 90.60 डेसिबल्स आशिल्ल्याची म्हायती जीएसपीसीबीन खंडपिठांत प्रतिज्ञापत्र सादर करून दिल्ली. ते उपरांत जीएसपीसीबीक कारवाय करपाचे आदेश जारी केल्ले. हे मजगतीं, सोमारा सुनावणी जाली तेन्ना आवाज प्रदुशण नेमा प्रमाण संबंदीत प्राधिकरणान ‘सनबर्न’ इलेक्ट्रॉनीक डान्स, म्युझीक महोत्सव आयोजीत करचे खातीर योग्य प्रक्रिया करिनासतना आनी गडबडीन परवानगी दिल्ल्याचो मुद्दो याचिकादारा वतीन वकील स्वाती कामत वाघ हांणी खंडपिठांत मांडलो. हाची दखल घेवन खंडपिठान गोंय राज्य प्रदुशण नियंत्रण मंडळ (जीपीसीबी) आनी बार्देस उपजिल्होधिकाऱ्याक वयले निर्देश जारी केल्यात. जाल्यार ह्या संबंदांत मुख्य सचिवाक दोन सप्तकांत अंतीम अहवाल सादर करपाक सांगला. तशेंच वयल्या यंत्रणांक 14 मार्च मेरेन प्रतिज्ञापत्र सादर करपाक सांगलां. ह्या प्रकरणाची फुडली सुनावणी 15 मार्चाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
