भांगरभूंय | प्रतिनिधी
भांगरभूंय । खबरां मेज
पणजीः गोंयांत घुंवळी वखदांचे वेव्हार वाडपाक लागिल्ल्यान ते घेवपाक लोकांक प्रवृ्त्त करपी सनबर्न ह्या इडीएम हे संगीत कार्यावळीक दिल्लो राज्य प्रशासनान दिल्लो परवानो रद्द करपाची मागणी हिंदू जनजाग्रुती समितीच्या शिश्टमंडळान उत्तर गोंयची जिल्होधिकारी मामू हागे हांका बुधवारा एक निवेदन भेटोवन केल्या. शिश्टमंडळांत भारत माता की जय संघटनेचे जागरण मुखेली रामदास सावयवेरेंकार, हिंदू रक्षा म्हाआघाडीचो सुरेश डिचोलकार, बायल संघटनेची हेमश्री गडेकर, हिंदू जनजाग्रुती समितीचे राज बोरकार आनी सनातन संसंथेची शुभा सावंत हांचो आसपाव आशिल्लो.
गोंयांत 27 तें 30 डिसेंबर मजगतीं सनबर्नाचें आयोजन जाता. ह्या संगीत महोत्सवांत हाचे पयलीं घुंवळी वखद चड प्रमाणात घेतिल्ल्यान लोक मेल्ल्याच्यो जायतो घडणुको घडिल्ल्यो आसात. ह्या प्रकारांक लागून राष्ट्रीय आनी आंतरराष्ट्रीय पांवड्यार गोंयचें नांव बदनाम जालां. गोंय घुंवळी वखदां मुक्त करप सरकारा कडल्यान अपेक्षीत आसा. मात पर्यटनाच्या नांवा खाला ईडीएमाक उर्बां दिवप म्हणल्यार एक तरेन घुंवळी वखदांच्या वेव्हाराक अप्रत्यक्षपणान उर्बां दिल्ल्या सारकें आासा अशें हिंदू जनजाग्रुती समितीन निवेदनांत नमूद केलां.
गोंयच्या लोकांनी सनबर्नाक विरोध केल्ल्यान तो कांय वर्सा पुणे हांगा घेतलो. सनबर्ना सारके संगीत महोत्सव तरणाटे पिळगेक वेसनाधीन करपी आसात. पाश्चात्य विकृतीचें उदात्तीकरण करपी आसात. सनबर्नाचें आयोजन हो संस्कृतीद्रोह आसा. सरकारान ताका मान्ययात दिवची न्हय. दिल्लो परवानो रद्द करून हे कार्यावळीची तिकेट विक्री बेगोबेग बंद करची अशी मागणी निवेदनांत केल्या.
पणजे शारांत चलिल्ल्या सेरेंडिपिटी कला उत्सवांत संत तुकाराम आनी गणपती हांचे केल्लें बिडबंन थांबोवपाचीच मागणी हिंदू जनजाग्रुती समितीन केल्या. गणपती आनी तुकाराम हिंदूची श्रद्धासुवात आसा. तांची बिटंबना केल्ल्यान हिंदूच्या धर्मीक भावना दुखावयल्यात. ते खातीर सेरेंडिपिटीचे आयोजक आनी कलाकारांक आड गुन्यांव नोंद करपाची मागणी समितीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
