भांगरभूंय | प्रतिनिधी
पोरण्या पायपांक लागून जाता उदकाची गळटी
पणजी : सध्या राज्यांतल्या २६ टक्के लोकांक २४ वरां पियेवपाच्या उदकाची पुरवण जाता. उदका पुरवण करपी ५० टक्के पायपलायन हीं ४० वर्सां पयलीची आसा. उदकाचो दाब वाडलो काय पायपां फुट्टात आनी उदकाची गळटी जाता. एप्रील मेरेन स्थितीत सुदारणा जातली, अशी म्हायती पियेपाच्या उदकाच्या खात्याचे मंत्री सुभाष फळदेसाय हांणी दिली.
मुख्यमंत्री डॉ. प्रमोद सावंत हांची बंगल्यार भेट घेतल्या उपरांत तांणी ही म्हायती दिली. चडान चड लोकांक २४ वरां पियेपाचे उदक मेळचें, म्हूण आमचे येत्न चालूच आसात. मात पायपां आनी हेर मुळाव्यो सुविदा पोरण्यो जाल्यात. एप्रील मेरेन आनीक १०० एमएलडी उदकाचो प्रकल्प तयार जातलो. हाचे उपरांत कांय प्रमाणांत उदकाचो उणाव पयस जातलो, अशेंय तांणी सांगलें. सध्या आमकां जें उदक मेळटा त्या सगल्या उदकाची पुरवण जाता. मात उदकाचो दाब वाडयल्यार पायपलायन फुटटा आनी उदक फुकट वता. उदकाच्या एका युनिटा खातीर खात्याक ३० रूपया खर्च येता. हेंच उदक गिरायकांक ४.१० पयशांनी मेळटा. हाका लागून उदकाचो वापर योग्य तरेन करपाची गरज आसा. ज्या जाग्यांचेर उदक चड येता, त्या लोकांनी उदक फुकट घालोवपाक जायना, असो उलो मंत्री सुभाष फळदेसाय हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
