भांगरभूंय | प्रतिनिधी
गोविंद गावडे : अध्यक्षपद भोवजन समाजाक दिवपाचें आव्हान
भांगरभूंय । प्रतिनिधी
पणजी : सध्याचो मगो पक्ष एका कुटुंबा पुरतो मर्यादीत जाला. तो भाऊसायबांचो पक्ष उरूंक ना. आतांचो पक्ष भाऊसायबांचोच आसा हें दाखोवन दितले जाल्यार जीत आरोलकार वा हेर भोवजन फुडाऱ्याक पक्षाचो अध्यक्ष करचो. भाजपाक सध्याच्या मगो वांगडा युती करपाची गरज ना. भाजपान आदेश दिलो जाल्यार फोंडें म्हालांतली सगळी जापसालदारकी आपूण घेवपाक तयार आसा, अशें कला आनी संस्कृती मंत्री गोविंद गावडे हांणी सांगलें. सोमारा पणजे ते पत्रकार परिशदेंत उलयताले.
गावडे हांणी सांगलें, मगोंतल्यान खूबशो भोवजन फुडारी भायर सरल्यात. काशिनाथ जल्मी, लवू मामलेदार, नरेश सावळ, बाबू आजगांवकार, दीपक पावसकार हांच्या सारक्या फुडाऱ्यांनी मगो खातीर जीण ओंपली. तरी लेगीत तांकां पक्ष सोडचो अशें कित्याक दिसलें, हाचो विचार जावपाक जाय. भाऊसायबान स्थापन केल्लो पक्ष हो गोंयांतल्या भोवजन समाजाचो, तळागाळांतल्यो लोकांचो पक्ष आशिल्लो. सध्याचो पक्ष माधवरावांच्या गोठ्यांतलो पक्ष जाला.
आपल्या बापायन, आपणे आदीं मगो पक्षा खातीर काम केल्लें. आतां जे व्हडल्या तोंडांत सांगतात, ते आदीं काँगसीचे एजंट म्हूण काम करताले. 1999 त हेच लोक काँग्रेसीक मत दियात म्हूण प्रचार करताले. मगोंतल्या बैल आनी म्हशींनी आपल्याचेर टिका करचे खातीर विचार करचो. कारण आयज जे उलयतात, तांच्या राजकारणांतलो श्रीगणेशा आपणे करून दिला. 1999 त आपूण, विनोद नागेशकार, शिवदास वेरेंकार हांणी यत्न केले, हेच खातीर हांकां तिकेट मेळिल्ली. 2012 सावन ह्या पक्षा वांगडा युती करची न्हय, अशें आपलें स्पश्ट मत आसा, अशें गावडे हांणी सांगलें. मगो पक्षाक वाडोवपाचें आशिल्लें जाल्यार हें काम हे आदींच जावपाचें. मात पक्ष एका कुटुंबा पुरतो मर्यादीत आशिल्ल्यान तें शक्य जावंक ना. लवू मामलेदार जेन्ना फोंडें लावन वेंचूऩ आयिल्ले, तेन्ना लेगीत मंत्रीपद हांच्याच कुटुंबांतले व्यक्ती मेळिल्लें. सध्या ह्या लोकांक फकत टक्केवारी आनी कमिशन जाय. तांकां पक्षाच्या बऱ्या – वायटाचो कसलोच फरक पडना. हे आदीं आपूण शिरोडें, प्रियोळ, फोंडें म्हालांत काम करून दाखयलां. आदीं आपूण मडकय लेगीत वेंचणूक लडयल्ली. थंय आयजूय आपले कार्यकर्ते आसात, अशें मंत्री गावडे हांणी सांगलें.
निरशेवणेंतल्यान वैयक्तीक आरोप : ढवळीकार
फाटले विधानसभा वेंचणुकेंत मंत्री गोविंद गावडे प्रियोळ मतदारसंघांत काठार पास जाले. येता ते विधानसभा वेंचणुकेंत वेंचून येवपाची खात्री नाशिल्ल्यान ते निरशेल्यात. हेच खातीर ते आमचेर वैयक्तीक आरोप करता, अशें मगोचे अद्यक्ष दीपक ढवळीकार हांणी ‘भांगरभूंय’ कडेन उलयतना सांगलें. पक्षाचे घटने प्रमाण पात्र आशिल्ली खंयचीय व्यक्ती फुडल्या काळांत मगोचे अध्यक्ष जावपाक शकता, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
