सद्याची विरोधकांची आघाडी विश्वासघातकीः आप

भांगरभूंय | प्रतिनिधी

भांगरभूंय । प्रतिनिधी
पणजीः सद्या ज्यो घडामोडी चल्ल्यात ते पळोवन विरोधकांचे आघाडीचेर विश्वास दवरप शक्य ना. एकामेकांक वेंग मारपी पक्ष आता एकामेकांची मारपाक उठल्यात. देखून आम आदमी पक्ष एकठांय फुडें वतलो आनी काय जाग्यार अपक्ष उमेदवारांक तेंको दितले, अशें आपचे गोंय संयोजक अमित पालेकार हांणी सांगलें.
पिर्ळणची आदली काँग्रेसीची फुडारी प्रगती संदीप वेर्णेकार हांणी आप पक्षात घरवापसी केली. तिका आपचे गोंय संयोजक अमित पालेकार आनी राष्ट्रीय म्हणयारे वाल्मिकी नायक हांणी पक्षात येवकार दिलो.
ह्या वेळार उलयतना पालेकार हांणी सांगलें, जे यत्न आरजीपी, गोवा फॉरर्वड आनी काँग्रेस हांचेनी एकठांय येवन करपाक जाय आसले ते जावंक ना.
पूण खंय ना खंय तरी ग्रेंड विरोधी आघाडी (गोवा) अशें म्हणटा तेन्ना हे विशींचे उलोवणे जावचे पयलीच एका पक्षान दुसऱ्या पक्षा आड उमेदवार घाले. दुसरो पक्ष म्हणटा आमका फटयले आनी तिसरो पक्ष ओग्गी आसा. अशा वेळार भाजपा आड लढो दितले जाल्यार ह्या आघाडीचेर विश्वास कसो दवरचो, असो प्रश्न पालेकार हांणी केलो.
सगळे मतभेद कुशीक दवरून एका मेजार बसून चर्चा करपाचो विचार वेंचणुकेक 20 दिस उरता तेन्ना येवपाक जायना. हो विचार चार म्हयन्या पयली येवपाक जाय आशिल्लो पूण हो खंयच येवंक ना. हांव गोंयकारांक सांगपाक सोदता वेंचणुकेक 17 दिस उरल्यात आनी आघाडीची चर्चा अजून चालू आसा. आरजीपी आनी काँग्रेसीन सीट घोशीत केल्या आनी गोवा फॉरर्वडान काम चालू केला. पूण आमी पयले पावल मारून नितळ उमेदवार रिंगणात घातल्यात, अशें पालेकार हांणी म्हणलें.
आमचे मन, आमचे काळीज आनी आमची वेंग सदाच उक्ती दवरल्या. जो बदल जाय तो हाडपा खातीर आमी कितेंय करपाक तयार आसात. पूण ह्या पांवड्यार ते शक्य ना. वेंचणुकेक सतरा दिस उरले आसतना आमचे चडशे उमेदवार थारल्यात आनी काय मतदारसंघात अपक्ष उमेदवारांक आमी तेंको जाहीर करतले. फुडले दोन-तीन दिसा भितर हे घडटले. पूण जे लोकांनी एकामेकांक वेंग मारली तांचेनी आयज एका मेका आड उमेदवार घातल्या. देखून सद्या तरी ह्या आघाडीचेर विश्वास दवरपाक शकना, अशे पालेकार हांणी स्पश्ट केले.