सद्दां नुस्तें खाता म्हूण ऐश्वर्याचे दोळे सुंदर : मंत्री गावित हांचें वक्तव्य
भांगरभूंय | प्रतिनिधी
मुंबय। खबरां संस्था : ताल्ले, बांगडे खाल्यार बुद्धी वाडटा, हें आदले मुख्यमत्री सर्गेस्त मनोहर पर्रीकार हांचें विधान कांय वर्सां पयलीं बरेंच गाजिल्लें. महाराष्ट्रांतले भाजपाचे मंत्री विजयकुमार गावित हांणीय नुस्त्या संबंदी विधान केलां. मात, तें वादग्रस्त थारूं शकता. एका खबरां चॅनलान ही बातमी दिल्या.
पयलीं राष्ट्रवादी काँग्रेसींत आसतना गावित हांणी मंत्रीपदां सांबाळ्ळ्यांत. उपरांत भाजपांत वतकच तांकां स वर्सां उपरांत मंत्रीपद मेळ्ळें. एके जाहीर कार्यावळींत उलयतना तांणी ‘सद्दां नुस्तें खाता म्हूण ऐश्वर्या रै- बच्चन हिचे दोळे सुंदर जाल्यात’ अशें वक्तव्य केलें.
नेमके कितें म्हणलें गावित हांणी?
उपस्थितांक नुस्त्याचे फायदे सांगतना गावित हांणी म्हणलें, ‘तुमी ऐश्वर्या रै हिका पळयल्या? ती दर्याचे देगेर रावपी. बंगळुरूचे दर्यादेगेर रावपी. ती सद्दां नुस्तें खाताली. पळयले मूं तुमी तिचे दोळे? तुमचेय तशे दोळे जावपाक शकतात. होय एक फायदो आसा नुस्त्याचो’
मात, गावित हांचें सकयलें उलोवप वादग्रस्त थारपाक शकता. ‘नुस्तें खातकच दोन फायदे जातात. चली चिकनी दिसपाक लागता. दोळे तरतरीत दिसतात. कोणीय पळयत जाल्यार तिका पटोवचेंच अशें दिसतलें. आमची कांतूय तुकतुकीत दिसता. नुस्त्यांत एक प्रकारचें तेल आसता. ताका लागून दोळ्यांचेर बरो परिणाम जाता. त्या तेलाक लागून कांतूय बरी दिसता, अशेंय गावित हांणी म्हणलें.
ऐश्वर्या शिवराक काय….?
ऐश्वर्या राय हिची मायभास तुळू. ती मंगळुरी. तिच्या कुळारा ती एकलीच नुस्तें, चिकन खाता. बाकी सगळे कडक शिवराक. तिका दीपिका पदुकोण प्रमाण नुस्त्याचें मंगळुरी पद्दतीचें हुमण आनी चिकन करी आवडटा. ‘मूळ मंगळुरी जाल्ल्यान हांव ल्हानपणा सावन आवयक रांदपाक मदत करतालें. म्हाका रांदपाकूय येता’, अशें ऐश्वर्यान हालींच सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
