भांगरभूंय | प्रतिनिधी
आंतरराष्ट्रीय सौंदर्य आनी भलायकी ऑलिम्पिकांत केलें भारताचें प्रतिनिधित्व
पणजी: जिणेंत शरिरीक, मानसीक आनी अध्यात्मीक पैलूंचो आसपाव आशिल्ली सोबितकाय आनी भलायके खातीर खोल नदर आसप गरजेचें. भलायकी आनी बरेंपण तिगून उरपा खातीर भारतांतलें शास्त्र आनी ज्ञान हें पुराय संवसारा खातीर एक देणगी जावन आसा. ह्या मळार भारत आनी कोरिया हांचे मदल्या संबंदांक आनी सहकार्याक नक्कीच उर्बा मेळटली, अशें पद्मश्री विभुशीत सद्गुरु ब्रह्मेशानंदाचार्य स्वामीजींनी हांणी म्हणलें.
दक्षीण कोरिया हांगा इंटरनॅशनल ह्युमॅनिटी जनरल युनियना वरवीं आंतरराष्ट्रीय सौंदर्य आनी भलायकी ऑलिंपीक 2023 हे ईतिहासीक कार्यावळीच्या उक्तावणा वेळार मुखेल सोयरे ह्या नात्यान पुज्य स्वामीजी उलयताले.
मजगतीं, स्वामीजी भारताच्या आध्यात्मीक आनी सांस्कृतीक दायजाचो संवसारीक पांवड्यार प्रचार करपा खातीर हे कार्यावळींत हाजीर रावले. आध्यात्मीक धर्मगुरु ह्या नात्यान स्वामीजींनी भारताचें प्रतिनिधित्व केलें.
ह्या ऑलिंपिकांत विवीध देशांतल्या खुबश्या नामनेच्या सौंदर्य आनी भलायकी वेवसायिकांनी वांटो घेतिल्लो. भारतीय शिष्टमंडळांत अॅड्. ब्राह्मीदेवीजी (अध्यक्ष सत्गुरु फावंडेशन) आनी डॉ. गोपाल जी (अध्यक्ष ग्लोबल योग अलायन्स) हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
