भांगरभूंय | प्रतिनिधी
अमेरिकन आहार मार्गदर्शक तत्वां प्रमाण प्रौढ बायलेक दिसाक २५ ग्राम फायबर, जाल्यार प्रौढ दादल्याक ३५ ग्राम फायबराची गरज आसता. चडशें फायबर फळां आनी भाजयो हांचे पसून मेळटा. पूण कांय भाजयांनी फायबर चड प्रमाणांत आसतात, तातूंत मुळां भाजी सगळ्यांत म्हत्वाचीं आसता.
गाजर, बीट, गोड बटाट हे भाजयांचो आसपाव भरपूर फायबर आशिल्ल्या भाजयां मदीं जाता. ब्रोकोली, कोबी, काराथ्यानूय व्हडा प्रमाणांत फायबर आसतात. फायबर हो पचूंक शकना असो कार्बोहायड्रेटाचो एक प्रकार.
फास्ट फूड आनी प्रक्रिया केल्ले जिन्नस खाल्ल्यान चडश्या लोकांक फायबर मेळना. हाका लागून बद्धकोष्ठताय, रोखडेंच थकप आनी जिवान मोटे जावपाच्यो समस्या निर्माण जातात. फायबर भुरग्यांक वाडपांत मजत करता, रोगप्रतिकारक शक्त वाडयता आनी वजन नियंत्रणांत दवरपाक मजत करता.
पिराये प्रमाण फायबराची गरज वेगवेगळी आसता. अमेरिकन कॅकाडमी ऑफ पीडियाट्रिक्साच्या ‘पिराय + ५’ नेमा प्रमाण दर भुरग्याचे पिराये प्रमाण ५ ग्राम घालचे. देखीक- ८ वर्सां पिरायेच्या भुरग्याक दिसाक १३ ग्राम फायबर जाय. नेण्ट्या भुरग्यां खातीर हो आंकडो वाडून २०-२५ ग्राम मेरेन पावता. तुमच्या आहारांतलें फायबराचें प्रमाण वांगडाच वाडचें न्हय हाची जतनाय घेयात.तें ल्हव ल्हव वाडोवचें, नाजाल्यार तुमका ऍसिडीची जावपाक शकता.
भाजयांनी फायबर
बीट, कांदो, कोबी, सलगम नांवाचीं कंदमुळां खाल्यार तातूंत तुमकां भरपूर फायबर मेळटलेें. तशें दरेके भाजयेंत विवीध तरेचीं जीवनसत्त्वां आनी खनीज आसतात. आमच्या शरिराक अशीं जिवनसत्वां आनी खनीज समान प्रमाणांत गरजेचीं आसतात. हाका लागून सगले तरेच्यो भाजयो खावच्यो.
तशेंच ओट्स आनी ब्रावन रायस सारकिल्ल्या धान्यांतूय बरेंच फायबर आसता. नट्स, तशेंच फळां जशीं आपोल, केळीं आनी चिया बियांनी फायबर आसता. नेमान फायबर मेळचे खातीर सकाळे च्याक ओट्स वा फ्रूट सॅलड वापरात.
कांय भाजयो सोलून खावच्यो न्हय. बटाट आनी वांयंगी सारकीं धुवचीं आनी तें सोलिनासतना खावचें. ज्यो भाजयो शिजयल्ले शिवाय खावपाक शकतात, त्यो तश्योच शिजय नासतना खावच्यो. जर शिजयतात जाल्यार त्यो उकडून वा मात्शी वाफ दिवन खावच्यो. तांचो रोस वापरिल्ल्यान तातुंतलें फायबराचें प्रमाण देंवता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
