भांगरभूंय | प्रतिनिधी
फोंडें शारांतलें सदर भौशीक गणेशोत्सव मंडळ अंदूं 51व्या वर्सांत पदार्पण करता. अंदूंच्या भांगरा महोत्सवी वर्सा निमतान विवीध धर्मीक तशेंच सांस्कृतीक कार्यावळींचें आयोजन केल्ल्याची म्हायती मंडळाचे अध्यक्ष सुनील देसाय हांणी पत्रकार परिशदेंत दिली.
31 ऑगस्ट दिसा सकाळीं गणेश मुर्तीचें पुजन जातलें. 3, 4 आनी 5 तारखेक सांजवेळा 5.30 वरांचेर थळाव्या कलाकारां वतीन भजनाची कार्यावळ जातली. 6 तारखेक दनपारां 2.30 वरांचेर नाट्यगीत गायन सर्त आनी रातच्या 8 वरांचेर पुण्याचे ह.भ.प. चारुदत्त आफळे बुवा हांचें किर्तन जातलें.
7वेर सकाळीं 9.30 वरांचेर घुमट आरती सर्त जातली. सांजवेळा 7 वरांचेर जैतिवंत पंगडाक मानेस्तांचे हस्तुकीं इनामां भेटयतले. उपरांत रातच्या 8 वरांचेर ह.भ.प. चारुदत्त आफळे बुवा हांचें किर्तन जातलें. 8वेर सकाळीं 9.30 वरांचेर बायलां खातीर भजनाची सर्त आनी सांजवेळा इनामां भेटवण सुवाळो जातलो. रातच्या 8.30 वरांचेर प्रियदर्शन जाधव आनी अमोल बावडेकर हांचे ‘हसता हसवता’ मराठी नाटक सादर जातलें.
9 तारखेक सकाळीं 9.30 वरांचेर गणेश याद करतले. रातच्या 8.30 वरांचेर पंडीत रघुनानंदन पणशीकर आनी सावनी शेंडे हांची नाट्य भक्ती धारा कार्यावळ जातली. 10 तारखेक सकाळीं 9.30 वरांचेर सत्य विनायक व्रत पुजा, दनपारां 4 वरांचेर ल्हान भुरग्यां खातीर चित्रकला सर्त आनी रातच्या वेळार प्रचला आमोणकार आनी पंडीत जयतीर्थ मेवुंडी हांची भावरंग कार्यावळ जातली. 11वेर सकाळीं जप अनुश्ठान, 11 वरांचेर सामुहीक अथर्वशीर्ष पठण हातूंत सुमार 1 हजार बायलां वांटेकार जातल्यो. सांजवेळा 6 वरांचेर फळांची पावणी आनी उपरांत गणेश मुर्तीचें कपिलेश्वरी हांगा विसर्जन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
