भांगरभूंय | प्रतिनिधी
सध्या पेत्रोल, डिझल आनी रांदपाच्या गॅसाचे बाबतींत आमची काणयेंतल्या सोंश्या सारकी गत जाल्या. झाडां पोंद न्हिदिल्लो सोंसो फाटीर पान पडटकच जागो जाता आनी मळब पडलें म्हूण किळच्यो मारीत रावता आनी ताचे फाटल्यान एकेक करून सगलेच प्राणी. प्रधानमंत्री मोदी हांणी मंगळारा राज्यसभेंत सांगलें, ‘इराण झूज चालूच उरल्यार ताचे गंभीर परिणाम जातले. येवपी काळ कोरोना काळा सारके परिक्षेचो आसूं येता. तेन्ना आमी जशे एकवटान रावले, तशे एकठांय रावंक जाय. केंद्र आनी राज्यांक एकठांय काम करचें पडटलें.’ कोरोना हें उतर कानार पडना फुडें सगल्यांच्याच दोळ्यां मुखार लाॅकडावन उबो रावलो. कड्डाक लागिल्ल्या उज्या भशेन हें पातळत गेलें. भितर तेल घालपाक सोशल मिडिया आशिल्लीच. परिणाम पेत्रोलपंपांचेर रांकोच रांको. टांकी फूल आशिल्ले पसून पाव लिटर पेत्रोल वचत हे आशेन लायनीक रावले. सोंश्याक मळब दिसलें आनी आमकां लाॅकडावन! प्रधानमंत्री आयज मुख्यमंत्र्यां कडेन संवाद सादतले. पेट्रोलियम मंत्रालयान आमचे कडेन 60 दीस पावतलो इतलो इंधन सांठो आसा अशें काल जाहीर केलां. ते वटेन इराणान पांच देशांक बोटी व्हरपाक परवानगी दिल्या. तातूंत भारतूय आसा. गोंयांतूय दोन बोटी आयल्यात. एक आठ दिसांनी येतली.
सध्या लोक पेत्रोल, डिझेला फाटल्यान धांवतात, तो फक्त पॅनीक खरेदी जावची आनी सरकार बदनाम जावचें म्हूण केल्लो प्रोपगंडा अशें सरकार समर्थक म्हणटात, तर दुसरे वटेन इंधनाचो खरोच उणाव आसा, अशें विरोधक सांगतात. ह्या बोवाळांत सुरळीत मेळटालो, तो गॅस सिलिंडर (घरगुती आनी वेवसायीक) मेळप कुस्तार जाला. वेवसायीक सिलिंडरांची पुरवण सारकी नाशिल्ल्यान हाॅटेलांक मार बसला. सिलिंडरांचो काळोबाजार सुरू जाला. सध्या केरोसीन दिवप चालू केलां. कालच्या निवेदना प्रमाण, ‘इंधनांचो तुटवडो ना. सगल्या पंपाचेर पयलीं भशेन पुरवण सुरू आसा. आदले सारक्यो बोटी येनात, पूण अदीं मदीं येतात. तरीय साठ दीस पावतलें इतलें कच्चें तेल आनी इंधन सरकारा कडेन आसा.’ कांय जाण वावड्यो सोडटात, ताचेर विस्वास दवरचो न्हय, असो उलो केंद्र सरकारान मारला. देशांतल्यो तेल कंपनी, रिफायनरी पूर्ण तांकीन काम करतात. सरकार हेर देशां कडल्यानूय इंधन हाडपाक लागलां. गॅस सिलिंडर पयलीं सारके मेळपाक लागतले, तेन्नाच लोकांचो विस्वास बसतलो. नाजाल्यार ‘मळब पडलें’ म्हणीत सगलेच धांवत रावतले. कोरोनाच्या दुदान तांचें तोंड हुलपलां, आतां इंधनरुपी ताक ते फूक मारून पियेतात. कोणाक दोश दिवपाक मेळचो ना.
मूय मारिल्ले भशेन एका दिसान इराणाक चिड्डून उडयतले, अशें अमेरिका आनी इझ्रायलाक दिशिल्लें. अफगाणिस्तान, व्हिएतनामाचे बाबतींतूय अमेरिकेक असोच अहंकार जाल्लो. मात हे फुगे फुटले. तातूंत हजारांनी लोक मेले आनी अब्जांनी डाॅलरांची संपत्ती काबार जाली. सध्या चल्लां तें झूज थांबोवपाचो यत्न करपाक जाय. तिनूय देशां कडेन चर्चा करून वा तांकां फोन मारून (?) हो संघर्श थांबोवं येता खंय. मागीर नाटो, युनो, राष्ट्रकूल संघटणा….. सगल्यांनीच यत्न करचे. पूण, सध्या चड गरज आसा ती गॅस, इंधनाची बचत करपाची! आहारांत बदल करचो पडटलो. रांदपाचीं माध्यमां बदलचीं पडटलीं. फळां, हरव्यो भाजयो, ड्राय फ्रुट्स, पाव, स्कॅक्स, रेडिमेड चपाती, परोठा, धंय, दूद, कोम आयिल्लीं धान्यां, तोय, सालाद, लिंबू पाणी चड वापरपाचेर भर दिवंक जाय. उणो गॅस लागता तसलें जेवण करूंक जाय. इंधन वाटावपाक गाडयांचो वापर उणो करचो. सरकारान भौशीक येरादारी सुरळीत केल्यार हें शक्य आसा. स्वताच्यो आवडी- निवडी, राहणिमानाचेर नियंत्रण दवरल्यार कसलीच अडचण येवची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
