सत्य काय, फक्त आरोप?

भांगरभूंय | प्रतिनिधी

दले वीज मंत्री पांडुरंग मडकयकार हांणी ‘सध्या राज्यांत लूट चल्ल्या. सगले फुडारी पयशे मेजपांत गुल्ल आसात. हांवें एका मंत्र्याचे पीएक 20 लाख रुपया दिल्यात’ असो गंभीर आरोप केलो. हरशी लोक अशें सर्रास उलयतात. आयज न्हय, 1980 च्या दसका सावन. कांय जाणां कडेन पुरावे आसतले. थोड्यांनी स्वता पयशे दिल्यात आसतले. तर उरिल्ले वाऱ्या वयल्यो खबरो सांगतात आसतले. पूण, चर्चा, कुजबूज ही कायम चालू आसात. भ्रश्टाचार, गैरकारभार, गैरप्रकार, वशिलो. अश्यो नाना कला आशिल्ले राजकी मळाचेर वावुरतात. प्रशासनांतूय आसात. हेर मळांचेर नात, अशें म्हणपाचें धाडस कोण करचो ना. सांपडलो जाल्यार चोर, ना तर साव. मडकयकार ही तशी सादी व्यक्ती न्हय. ते आदले वीज मंत्री. बरोच काळ कुमारजुवें मतदारसंघांतल्यान वेंचून आयल्यात. तांची घरकान्न, भावूय राजकी मळाचेर आसात. भाजपाचे राष्ट्रीय सरचिटणीस बी एल संतोष राजकी परिस्थिती जाणून घेवपाक पक्ष फुडाऱ्यां कडेन भासाभास करताले. त्या वेळार मडकयकार हांंणी हो आरोप केलो. पत्रकारांकूय तांणी ही गजाल सांगलीं. ‘सादें काम. म्हजी फायल एका मंत्र्यान आडावन दवरली. कोणूय विचारपाक आयल्यार पयशे दिवचे पडटले, अशें ताका सांग, असो निरोप ताणें पीए कडेन दवरलो. हांवें वेवस्थापकाक धाडलो. ताणें सांगिल्ले प्रमाण 20 लाख रुपया दिले. वेळ येतकच हांव त्या मंत्र्याचें नांव जाहीर करतलों.’ सध्या कसलेंच काम पयशां बगर जायना. चल्ल्या ती लूट, भ्रश्टाचार न्हय, असो गंभीर आरोपूय मडकयकार हांणी केलो. हाचेर राजकी खवदळ जालो ना, तरुच अजाप. विरोधकांनीच न्हय, तर सत्ताधारी आमदारांनीय प्रतिक्रिया दिल्यात.
‘वक्त’ सिनेमांतलो राजकुमार हांचो डाॅयलाॅगूच एका मंत्र्याक याद जालो. ‘चिनाॅय सेठ, जिनके अपने घर शीशे के हो, वो दुसरों परत पत्थर नहीं फेका करते’ लाच मागपी त्या मंत्र्याचें नांव मडकयकार हांणी जाहीर करचें आनी पुलिशेंत कागाळ करची, असो सल्लोय तांणी दिलो. हांगा चिनाॅय सेठ तशे उणें नाशिल्ले, आयजूय आसतले. मात तांचे आड पुरावे दिवपाक कोण मुखार येवचे नात. म्हणटकच आरोप हे कायम आरोपूच उरतले. तरीय सत्ता वचून विरोधक जातकच बऱ्याच खासदार, आमदारांचेर, स्वराज्य संस्थांतल्या चिनाॅय सेठांचेर कारवाय जाल्या. मडकयकार हे आदले मंत्री आशिल्ल्यान पुलिशेन तांच्या आरोपाची स्वता दखल घेवन चवकशी करची आनी मंत्र्याचें नांव जाणून घेवचें, गुन्यांव नोंद करचो, अशें आवाहन विरोधकांनी केलां. खुद्द मुख्यमंत्र्यान ह्या आरोपाचेर प्रतिक्रिया दितना, खंयच्या मंत्र्याक, कसल्या कामा खातीर पयशे दिल्यात, तें फक्त मडकयकारूच सांगपाक शकतात, तांणीच आपलो आरोप सिद्ध करचो, अशें म्हणलां. हो फक्त एक आरोप काय तातूंत खरेंच तथ्य आसा, असो दुबाव जायत्या लोकांनी उक्तायला. सरकारा वयले राजकी तिडकीक लागून तें अशें उलोवन गेल्यात, अशेंय थोड्यांक दिसता. तर भोवतेकांक हो आरोप खरो अशें दिसता. आमदार विजय सरदेसाय हांणी तर आपूण पयलीं सावन हेंच उलयतां. विधानसभेचीं अधिवेशनां दोन – तीन दिसांचीं जातात, तीं विरोधकांच्या आवाजाचो भंय दिशिल्ल्यानूच, अशेंय तांकां दिसता. आतां ह्या आरोपाची, प्रस्नाची हेरांनी जाप सोदचे परस पांडुरंग मडकयकार हांणी स्वताच ‘दूद का दूद और पानी का पानी’ करप बरें. नांव सांगपाचें नासल्यार, स्लीप आॅफ टंग, अर्थाचो अनर्थ केला, व्हिडियो एडीट केला, अशेंय तांकां म्हणपाक मेळटा. ते खातीर म्हूर्त काडपाचीय गरज ना. शिगमो तेंकला. कांय कडेन धोलार तोणीय पडल्या. आतां हें रोंबाट रंगता काय धोल चिरपता, तें पळोवपाचें.
हाचेय आदीं सरकारांचे जायते आरोप जाल्यात. सुटकेशी व्हरपाक भाव, चली येता. गोडशें मागतात. निविदा काडचे पयलींच पांच टक्के दिवचे पडटात, इमारत बांदली काय दोन फ्लॅट मुखेल वावुरप्याच्या नांवार करचे पडटात तरातरांचे, रंगरंगयाळे आरोप जाल्यात. कांय वर्सां पयलीं बांदकाम खात्याच्यो नोकऱ्यो पयशे घेवन दिल्यात, असो जाहीर आरोप जाल्लो. करपी मंत्रीच. एकल्यान दुसऱ्याचेर केल्ल्या ह्या आरोपा खातीर नोकर भरतीय रद्द जाल्ली. उपरांत एक मंत्री पडलो, दुसरो अज्रंवर आसा. पूण प्रकरण पोल जालें आनी उडून गेलें.
भ्रश्टाचार ही समाजाक लागिल्ली कीड. राजकी मळाचेरूय न्हय, तर सगले कडेन हो रोटो वळवळटना दिसता. हाका फक्त आनी फक्त राजकी फुडाऱ्यांक, अधिकाऱ्यांक, पदार आशिल्ल्यांक जापसालदार धरपाक मेळचें ना. समाजूय तितलोच गुन्यांवकार. निमाणे दोनूय वटेन सर्वगुणसंपन्न अशे मनिसूच आसात. राष्ट्राचो खरो मोग, निश्ठा आसल्यार मनीस खंय चुकीचे मार्ग आपणायनात. खरें काय हें??