भांगरभूंय | प्रतिनिधी
चिंतन – 71
तुकोबा म्हणटात :
तुका म्हणे बरा सत्याचा सायास ।
नवनीता नाश नाहीं पुन्हा ॥
ही ओळ टेनिसाच्या संवसारांतली एक जिवी देख – रोजर फेडरर. टेनिसांत ताचें नांव फकत जैता खातीर न्हय, तर प्रामाणीकपण, धीर आनी शिस्त हांचे खातीरय घेतात.
भुरगेपणांत फेडरर खूब चिडचिडो आशिल्लो. हारलो म्हणटकच तो आपलो रॅकेट उडयतालो, दोळ्यांतल्यान दुकां घेवन कोर्टांतल्यान भायर सरतालो. ताच्या प्रशिक्षकान ताका सांगलें – “फटींगपणा करून जिखूं येता, पूण तें तिगचें ना.” फेडररान ल्हवू ल्हवू आपली वृत्ती बदलली. शिस्त, सराव आनी सत्य हांकां ताणें आदार केले.
मातयेच्या कोर्टाचेर नादाल लागीं लागीं अजिंक्य आशिल्लो. 2008 वर्सा विंबल्डन फायनलींत फेडरर आनी नदाल हांचे मदीं मॅच जाल्लीं. ती आयज लेगीत टेनिसाच्या इतिहासांतली सगळ्यांत बरी मॅच मानतात. शेवटाक नादालान जैत मेळयलें, पूण फेडररान ही हार प्रामाणीकपणान मान्य केली.
फेडरर खूबदां जोकोव्हिच हाचे कडल्यान खूब थोडक्यांत हारला. 2019 वर्सा विंबल्डन फायनलींत तो दोन चॅम्पियनशीप गुण मेळोवन लेगीत हारलो. त्या वेळार ताणें म्हणलें – “हांव जितलो बरो खेळ्ळों, तितलोच जोकोविचूय बरो खेळ्ळो. ताका जिखपाचो अधिकार आसा.”
2016 वर्सा फेडरराच्या धोंपराक गंभीर दुखापत जाल्ल्यान सुमार एक वर्स खेळा पसून पयस रावलो. पूण ताणें हार मानली ना. शस्त्रक्रिया जाले उपरांत 2017 इस्वेंत तो परतून आयलो आनी ऑस्ट्रेलियन ओपन जिखलो – आनी तेंय ताच्या पोरण्या प्रतिस्पर्धी नादालाक हारोवन. ते उपरांत ताणें सलग जायते ग्रॅण्ड स्लॅम जिखून सत्या खातीर केल्लो यत्न कितलें अमरत्व दिता तें संवसाराक दाखयलें.
फेडरराच्या खेळांत एक खाशेली गजाल आशिल्ली ती म्हणल्यार प्रामाणीकपण. पंचान बॉलाचेर चुकीचो निर्णय दिलो जाल्यार लेगीत तो बॉल भायर गेलो हें कळ्ळें जाल्यार तें स्वता मान्य करतालो. तो सदांच प्रेक्षकां मुखार – आपल्या विरोधका कडेन, प्रेक्षकां कडेन आनी खेळा कडेन – आदरान वागतालो.
फेडररान 20 ग्रॅण्ड स्लॅम खिताब जिखले, विक्रमी 310 सप्तकां खातीर “संवसारीक क्रमांक एक” उरलो. पूण हें सगळें आसून लेगीत ताचें खरें यश म्हणल्यार – ताचो स्वताचेर आशिल्लो विस्वास. लोक ताची याद फकत विजेतो म्हणून न्हय, तर प्रामाणीकपण आनी सत्य हांचे खातीर झुजपी खेळगडो म्हणून करतात. देखूनच लोक ताका “जेंटलमन ऑफ टेनिस” म्हणटाले.
तुकाराम महाराज म्हणटात – “सत्या खातीर केल्लो यत्न अमर आसा.”
फेडररान जिखिल्ल्यो ट्रॉफी केन्ना तरी विसरायेर पडटल्यो. पूण ताचो खेळाचो स्वभाव, प्रामाणीकपण, विरोधकाक आदर – हें केन्नाच कोण विसरचो ना.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
