भांगरभूंय | प्रतिनिधी
एक नवी फूट. पोरूं जूनांत शिवसेनेंत फूट पडून शिंदे गट कुशीक सरिल्लो. उपरांत ताणें पक्षाचें नांव तेचवरीं चिन्ह आपल्या नांवार करून घेतलें. सत्तेचो आशिर्वाद आसतकूच कितेंय करूंक जाता म्हणपाचें ताणें दाखोवन दिल्लें. आतां एका वर्सा उपरांत राष्ट्रवादींत फूट पडली. नुस्तें जशें उदका बगर रावंक शकना तशेच हे राजकारणी लोक सत्तेबगर रावंक शकनात. तांकां कशीतरी सत्ता जायच आसता. अजीतदादाक तर फाटल्यान उपमुख्यमंत्री हें बिरूद लायले बगर आपूण जितो आसाशें दिसना जावंक जाय. कितले दीस म्हणून ताणें सत्तेबगर तळमळत रावपाचें? तशी सुरवेकूच ताचे कडेन सत्ता चलत आयिल्ली. भाजपा आनी शिवसेनेचो मुख्यमंत्री पदाक लागून वाद जालो आनी महाराष्ट्रांत वेंचणुको जावनूय सत्ता स्थापना जायना जाली तेन्ना अजीतदादान फांतोडेर भाजपा वांगडा वचून उपमुख्यमंत्रीपदाचो सोपूत घेतिल्लो. पूण काकान ताचो घात मारलो आनी काँग्रेसी वांगडा शिवसेनेक हात दिवन महाआघाडी सरकार स्थापन केलें. अजीतदादाक नाक मुठींत घेवन परतुचें पडलें. नव्या सरकारानूय ताका उपमुख्यमंत्रीपद मेळ्ळें, पूण काकांचो ताचेवयलो विश्वास गेलो तो गेलोच. आज ताचोच वचपो अजीतदादान ही फूट घालून काडला म्हणूंक जाता.
तशी राष्ट्रवादींत फूट पडटली म्हणपाचें खूब दीस पयलींच कळिल्लें. तसो खवदळूच पडिल्लो सगळ्याक. सर्वोच्च न्यायालयान जर शिंदे सरकारा आड निकाल दिल्लो आनी तांकां सत्ता सोडूंक लायल्ली तर तेन्नाच ही फूट पडपाची. आनी राष्ट्रवादी भाजपा वांगडा सत्तेंत भागी जावपाची. पूण न्यायालयान मिळमिळीत निकाल दिलो आनी ताका लागून राष्ट्रवादी वांचली. खरें म्हणल्यार शरद पवाराक सत्तेंत वांटेकार जावंक जायच आसलें. ताका काँग्रेस कितें, शिवसेना कितें वा भाजपा कितें सगळे सारकेंच. सत्ता मेळटकूच जाली. नासल्यार सोनिया गांधीच्या अध्यक्षपदाक विरोध करून काँग्रेस सोडपी पवार काँग्रेसीच्याच साथींत सत्तेंत वांटेकार कसो जावपाचो? जिका विरोध करून काँग्रेस फोडली आनी राष्ट्रवादी काँग्रेस निर्माण केली तोच मनीस त्याच सोनियाक साथ दिता हाचे वयल्यान कितें समजुपाचें तें समजात.
आतां देशभर भाजपाचें ल्हार आसा आनी आपणाक काय ह्या जल्मांत प्रधानमंत्री जावंक मेळचें ना हें होलमतकूच दुसरें कितेंय मेळळ्यार मेळ्ळें म्हणून ताणे भाजपा फुडार्यांच्यो भेटी घेवन जाल्यो. ताका जर राष्ट्रपती बी जावंक मेळिल्लें जाल्यार तो भाजपाक वायट म्हणचो नासलो. उरफाटे मोदी भक्तांपरस चड तोखणाय करपाचो. पूण हाताक कांयच लागना जाल्यार कित्याक तो ते वाटेन वतलो? पवारान राजकारणांत आजमेरेन फकत स्वताचोच फायदो पळेला. आतां अजीतदादाय ताच्याच पावलार पावल दवरून मुखार वता. आतांची फूट ही खरीच फूट काय शरद पवारांचीच एक चाल हें कळप सद्यातरी कठीण. पूण वेळ वता तशें खरें कळटलेंच म्हणात. ही पवाराची चाल आसपाची शक्यता इतलेच खातीर म्हणपाची, कारण ताचे सगळे विश्वासू म्होरके अजीतदादा वांगडा गेल्यात. देखून तुमी मुखार वचात, हांव येतां फाटल्यान अशें म्हणून पवार रावंक ना मूं?
आतां हाका दुसरेंय एक कारण आसूंक येता. तें म्हणल्यार भंय. दोन दिसां आदींच मोदीन आपल्या उलोवपांत राष्ट्रवादी काँग्रेसीन शिंपणावळ भानगडींत सत्तर हजार कोटींचो भ्रश्टाचार केला म्हणपाचें सांगिल्लें. हाचोच अर्थ कांय जाणांच्या फाटीक इडिचो हावको लागपाचो आसलो. जे कोण अजीतदादा वांगडा गेल्यात तांचेर कसल्यो ना कसल्यो केसी आसात. भुजबळ तर जामिनाचेर आसा. म्हणटकूच आनीक आनीक केसी नाकात म्हणून ही गंगेंत उडी न्हय मूं? म्हणजेच भ्रश्टाचार केला पूण ताची चवकशी जावची न्ही आनी भ्रश्टाचार पचचो म्हणून ही करामत न्हय मूं? हांगा एक मजेची आनी लजेची गजाल म्हणल्यार हाणीं खर्यांनीच जर भ्रश्टाचार केला जाल्यार भाजपा हांकां सत्तेंत कशी भागी करता? आनीक भ्रश्टाचार करपाक? काय भ्रश्टाचार जावंक नासतनाच बी तांकां भेश्टावपाक हवेंत सोडिल्ले फार? जर खर्यांनीच भ्रश्टाचार जाला जाल्यार तो उगताडार हाडून तांचे कडल्यान वसुली करूंक नाका आसली? ते भाजपाचे गंगेत पावले म्हणजे पावन जाले म्हणपाचे? आतां भ्रश्टाचार केला म्हणून सांगपी मोदीनूच हाची जाप दिवंक नाका?
निमाणें कितें तर सत्तेमुखार शाणपण चलना. आमी गोंयांतूय पळेलां. जांचे नांवार घोटाळे आसले ते सगळे सत्तेंत सामील जाल्यात. आतां तांकां त्या घोटाळ्यां बद्दल कोण विचारचो ना. सगळें पचून वतलें. पूण हातूंत लोकांचो मात विश्वासघात जाता. लोक मतां एका पक्षाक दितात कारण तांकां दुसरो पक्ष नाका आसता. आनी वेंचून येतकूच हे जर लोकांक नाका आशिल्ल्या वांगडा हात मेळोवंक लागले जाल्यार लोकांच्या मताक मोल खंय उरलें? आतां लोकांनीच ही वेंचणुकेची पद्दत बदलपाची मागणी करची पडटली. दर एका मतदार संघांत मनीस न्ही तर फकत पक्षाचें चिन्ह उबें करपाचें. आनी ज्या चिन्हाक चड मतां पडटा त्या पक्षान आपणाक जाय तो मनीस आमदार म्हणून दिवपाचो. फाल्यां तो पक्षाच्या नेमां आड गेलो जाल्यार ताका काडून दुसर्याक थंय धाडपाचो पक्षाक अधिकार आसतलो. अशें केल्यारूच ह्यो फुटी आनी हे भ्रश्टाचार बंद जातले. बरे लोक विधानसभेंत पावतले जे राज्याच्या विकासाक हातभार लायतले. जेन्ना हेवटेन तेवटेन उडयो मारूंक मेळच्यो नात तेन्ना भ्रश्टाचार करप्यांआड कारवाय जावंक पावतली. नासल्यार हे लोक कोणाचीय सत्ता आसूं थंय उडी मारून आपलो जागो धरतले आनी राज्याक बुड्डीत रावतले. कितलो तेंप चलूंक दिवपाचें हें?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
