सत्तासंघर्श खरेंच सोंपलो?

भांगरभूंय | प्रतिनिधी

अखेरेक महाराष्ट्राच्या फाटलें वर्सभर चलिल्ल्या सत्तासंघर्शाचेर सर्वोच्च न्यायालयाचेर निकाल आयला. जून 2022 त सध्याचे मुख्यमंत्री एकनाथ शिंदे हांणी आपल्या 15 आमदारां सयत शिवसेनेचे मुख्यमंत्री उद्धव ठाकरे हांचे आड बंडखोरी केल्ली. ठाकरे हांचे वागणुकेक लागून तांणी स्वता जावन हें बंड केल्लें, अशें म्हणटात. उपरांत वेंचणूक आयोगान शिवसेनेची याचिका सर्वोच्च न्यायालयांत आसतना शिवसेना हें नांव आनी पक्षाचें धनुश्य हें चिन्न शिंदे गटाक दिल्लें. कालच्या निकाला वरवीं शिंदे सरकाराक थाकाय मेळ्ळ्या. मात, न्यायालयान सगल्यांचेरुच सणसणीत बडी मारल्या. खास करून राज्यपाल भगतसिंग कोश्यारी हांचेर. विशेश म्हणल्यार तेन्नाचे मुख्यमंत्री उद्धव ठाकरे हांणी विस्वासदर्शक थाराव घेतिल्लो जाल्यार चित्र वेगळें दिसपाचें. तांणी राजिनामो दिवंक नाशिल्लो जाल्यार तांचें सरकार परत हाडपाक मेळटालें, अशें म्हत्वाचें निरीक्षण न्यायालयान नोंद केलां. न्यायालयाच्या घटनापीठान ठाकरे आनी शिंदे हांच्यो याचिका व्हडल्या सात जाणांच्या खंडपीठा कडेन वर्ग केल्यात. म्हणटकच वेगळो निकाल लागू येता, अशी आस्त ठाकरे समर्थकांनी उक्तायल्या. पूण तो मेरेन फुडले विधानसभा वेंचणूक येवं येता.
बंडखोरी केले उपरांत शिंदे सयत शिवसेनेच्या 16 आमदार भाजपा कडेन सोयरीक केल्ली. राज्यपालांनीय त्या सरकाराक सोपूत दिल्लो. उपरांत ठाकरे गटान बंडखोर आमदारांचें वांगडीपद रद्द करपाची, राज्यपालांचो भोवमत सिद्ध करपाचो आदेश रद्द करचो आनी महाविकास आघाडेचें सरकार परत स्थापन करपाची मागणी केल्ली. न्यायालयान राज्यपालांची भोवमत सिद्ध करपाची चांचणी चुकीची थारायली. मुख्य व्हीप नेमपाचो सभापतींचो निर्णयूय बेकायदेशीर थारायलो. उद्धव ठाकरे हांणी मुख्यमंत्री पदाचो आपूण जावन दिल्लो राजिनामो ही तांची व्हडली चूक थारली. तांचे वटेन भोवमत नाशिल्लें, म्हणून तांणी तो दिलो. आतां तांचें सरकार ह्या कालावधींत परत सत्तेर येवचें ना हें स्पश्ट जालां. अर्थांत ताका लागून एकनाथ शिंदे हांणी व्हडलो निस्वास सोडला आसतलो. नवें सात वांगड्यांचें खंडपीठ निर्णय घेतलें. आमदारांचे अपात्रताये विशींचो निर्णय सभापतींक घेवचो पडटलो, तोय थारावीक मुजती भितर.
हें प्रकरण व्हडल्या खंडपीठा कडेन धाडिल्ल्यान, हाचे मुखार हेर राज्यांनी अशें जावचें ना. राज्यपाल, सभापती कसलेंय पावल उखलतना विचार करतले. मुख्यमंत्री भोवमत सिद्ध करचे पयलींच राजिनामो दिवचे नात, अशें बऱ्याच कायदो जाणकारांक दिसता. ती भाबडी आशा थारची न्हय. राज्यपालान खंयच्याच पक्षाक तेंको दिवप चुकीचें. पक्षांतर्गत वादांत लक्ष घालपाचो राज्यपालांक अधिकार ना, तशेंच सरकाराचेर दुबाव घेवपाची, भोवमत चांचणी करपाक सांगपाची गरज नाशिल्ली, अशें सर्वोच्च न्यायालयान स्पश्ट केलां. ताचे वयल्यान महाराष्ट्राच्या आदल्या राज्यपालांच्या निर्णयां मुखार प्रस्नचिन्न लागता. आतां हेर राज्यपालांकूय सादूर रावचें पडटलें. पक्षांतल्यान एक गट फुटलो जाल्यार तो पक्षाचेर आपलो दावो करपाक शकना, हें न्यायालयाचें निरीक्षण म्हत्वाचें. हे वटेन ते वटेन उडक्यो मारप्यांकूय आतां चितचें पडटलें. आयज मतदारांच्या कल्याणा खातीर सत्तेच्या कदेलाचेर बशिल्ल्या पक्षांनी वचपाचे प्रकार वाडल्यात. लोकांच्या तेंक्यार सत्तेर आयिल्ल्या पक्षांक पसून आमदार फुटिल्ल्यान विरोधांत बसचें पडलां. न्यायालयान सगल्यांचेच कान पिळ्ळ्यात. तरीय सध्याच्या सरकाराक हात लावंक ना, उरफाटें सभापतींकूच अपात्रताये विशीं निर्णय घेवपाक सांगलां, हाचेर कांय जाणांनी टिका केल्या. सरकार विरोधकांनी राज्यपालांच्या तेन्नाच्या निर्णयाचेरुय दुबाव उक्तायल्यात. आदित्य ठाकरे हांणी तर श्री. कोश्यारी हे भाज्यपाल आशिल्ल्याचें सिद्ध जालां, अशी विखारी टिका केल्या. आतां तीन म्हयन्यांचो खेळ उरला. हिंमत आसा जाल्यार शिंदे गट- भाजपान आतांच वेंचणुकेक सामकार वच्चें अशें आव्हान तांणी दिलां. मुख्यमंत्री एकनाथ शिंदे हांकां हें सत्याचें जैत दिसता. विचारधारे कडेन प्रतारण करप्यांक संधीसादू फुडाऱ्याचेर फुलयिल्लें हें थापट अशेंय तांकां दिसता. तांणी विचारधारेचो मुद्दो उपस्थित केला खरो, पूण आयज ती खरेंच उरल्या? परस्पर विरोधी विचारसरण्यो हांगा एकरुप जावन एकमेकां वांगडा सुखान संवसार करतना दिसता.
आतां शिवसेना आनी धनुश्यबाण हांचे विशींच्या निर्णयाचेर वेंचणूक आयोग कितें थारायता, तें पळोवचें पडटलें. कारण बाळासाहेब ठाकरे ह्या नांवाक महाराष्ट्रांत जबरदस्त युएसपी आसा. तें आपले कडेन उरचें हे खातीर शिंदे आनी ठाकरे गट यत्न करतले. लोकसभा आनी महाराष्ट्राचे विधानसभा वेंचणुकेचेर कालच्या निर्णयाचे कितें परिणाम जातात, हाची उमळशीक राजकारण मोगींक आसतलीच. सर्वोच्च न्यायालयान निर्णय दिला. आतां बाॅल मतदारांच्या रिंगणांत आसा, इतलें मात निश्चीत.