भांगरभूंय | प्रतिनिधी
शेतकी खात्यान बीं वाटपाचेर दिलो भर
वाळपय, प्रतिनिधी : सत्तरींतल्यो जमनींत विवीध लागवडीं खातीर पुश्टीक द्रव्यां आसात. ताका लागून शेतकी खात्या वतीन विवीध तरेची लागवड करपाक उर्बा दितात. आतां शेतकी खात्यान ह्या म्हालांत वेलची केळींच्या लागवडीचेर भर दिवपाचें थारायलां. येवपी काळांत दोन एकर वाठारांत सुमार ३००० वेलची केळींची लागवड करतले. हातूंत केळी उत्पादकांक व्हड प्रमाणांत फायदो जावपाक शकता, असो दावो वाळपय विभागीय शेतकी खात्या वतीन केला. हे लागवडीक सध्या सुरवात जाल्या. येवपी पंदरा दिसांनी ती पुराय जातली आनी उपरांत सत्तरी म्हालांतल्यान व्हडा प्रमाणात वेलची केळीच्या उत्पादनाक सुरुवात जातली अशें विभागीय कृषी अधिकारी विश्वनाथ गांवस हांणी सांगलें.
टिशू कल्चर वेलची लागवड
गांवस हांणी म्हायती दितना सांगलें, सत्तरी म्हालांत टिशू कल्चर वेलची केळीच्या लागवडीचो प्रयोग करतले. सध्या सत्तरीच्या विवीध भागांनी दोन हेक्टर वाठारांत ही लागवड करपाचो निर्णय घेतला. हाचें बीं वाळपय विभागीय कृषी कार्यालयान उपलब्ध केलां. हाका केळीं उत्पादकां कडल्यान बरो प्रतिसाद मेळ्ळा. टिशू कल्चर हें अर्थीक उत्पन्नांचें सामकें उपेगी पीक. हातुंतल्यान शेतकरी भावांक बरे तरेन अर्थीक लाव मेळपाक शकता. ह्या म्हालांतली जमीन ही पुश्टीक आशिल्ल्यान हे जमनींत हाची लागवड बरे तरेन जावपाक शकता. हाका लागून हे लागवडीचेर भर दिल्या अशें तांणी सांगलें.
शेतकरांक पुराय मार्गदर्शन
टिशू कल्चर वेलची केळी लागवड करपा विशीं शेतकरी भावांक पुरायेन मार्गदर्शन केलां. ह्या केळीची लागवड कशे तरेन करची, ताचें वेवस्थापन कशें करचें हे विशीं वेगवेगळ्या पांवड्यार बसका घेवन तांकां मार्गदर्शन केलां. हाका लागून ही लागवड निश्चीतूच येसस्वी थारतली असो दावो शेतकी खात्या वतीन केला. कांय उमेदी शेतकारांनी हे विशीं आपली इत्सा दाखयल्या उपरांत शेतकी खात्यान ह्या प्रकारची लागवड करपाचेर भर दिल्या अशें तांणी सांगलें. सध्यातरी उपलब्ध केल्लें बीं उत्पादकां मेरेन पावलां. हाची लागवड कांय प्रमाणांत सुरू केल्या. आठ ते पंदरा दिसांनी लागवड पुराय जातली अशें तांणी सांगलें.
बाजाराचो हुस्को नाका
वेलची केळीची लागवड शेतकारां खातीर अर्थीक नदरेन फायद्याची थारतली. हे लागवडी उपरांत बाजारा विशीं कसलीच चर्चा करपाची गरज ना. बाजारांत वेलची केळींक व्हडा प्रमाणात मागणी आसा. सध्या बाजारांत ३५ रुपया किलो दरान हीं केळीं विकतात. हातुंतल्या बरे तरेन अर्थीक फायदो जातलो, अशी म्हायती गांवस हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
