भांगरभूंय | प्रतिनिधी
म्हाऊस पंचायती वतीन जागृताय कार्यावळ
वाळपय: म्होंवामूस पोसून बरे तरेन स्वयं रोजगाराची संद उपलब्ध जावं येता. सध्या ह्या म्हालांतल्या सैमीक वातावरणांत म्होंवामूस पोसपाचो वेवसाय बरे तरेन स्थापन जावपाक शकता. हे खातीर शेतकी खात्या वतीन आनी खादी ग्रामोद्देगा वतीन अनुदान मेळटा. हाचो सत्तरी म्हालांतल्या नागरिकांनी फायदो घेवचो. हाचे वरवीं ह्या म्हालांत व्हडा प्रमाणांत अर्थीक उलाढाल निर्माण जावंक शकता. अशे तरेचो प्रयोग आतां मेरेन खुबश्या जाणांनी येसस्वी करून दाखयला. हांगच्या नागरिकांनी ह्या वेवसायांत तयारी दाखयल्यार हे येवजणेचो लाव मेळोवन दिवपाचो यत्न करतले अशें आस्वासन म्हाऊस पंचायती वतीन आयोजीत म्होंवामूस पोसपा विशींचे कार्यावळींत उलयतना मेल्वीन डिसोझा हांणी दिलें.
म्हाऊस पंचायतीच्या आत्मनिर्भर भारत आनी स्वयंपूर्ण गोंय हे येवजणे खाला हे कार्यावळीचें आयोजन केल्लें. हे कार्यावळींत व्हडा प्रमाणांत नागरीक हाजीर आशिल्ले.
ह्या वेळार माचयेर पंचायतीची पंच वांगडी प्रीती गांवकार आनी स्वयंपूर्ण मित्र श्याम सावंत हाजीर आशिल्लीं.
कर्नाटक वाठारांत ह्या वेवसायांतल्यान व्हडा प्रमाणांत अर्थीक उदरगत जाल्या. अशे तरेची अर्थीक उदरगत गोंयांतूय जावं येता. ताका लागून म्हाऊस पंचायतीन घेतिल्ल्या फुडाकाराक नागरिकांनी सहकार्य करचें अशी मागणी मेल्वीन डिसोझा हांणी केली.
राष्ट्रीय आंतरराष्ट्रीय बाजारपेठेंत सैमीक म्होंवाची बरी मागणी आसा. सत्तरी म्हालांत हो वेवसाय बरोच स्थापन जावपाक शकता, पूण हे खातीर नागरिकांनी बरेच यत्न करप गरजेचें अशें डिसोझा हांणी फुडें सांगलें.
हे विशीं उलयतना स्वयंपूर्ण इश्ट श्याम सावंत हांणी सरकारी येवजण चालीक लावपाच्या हेतान आतां मेरेन म्हाऊस पंचायत वाठारांत विवीध कार्यावळी घडोवन हाडिल्ल्यो. नागरिकांनी ताका बरो आदार दिला. फुडल्या काळांत अशाच कार्यावळींतल्यान पंचायतीच्या सगळ्या घटकांक फायदो जावचे खातीर यत्न करतले. तेच प्रमाण म्होंवामूस पोसपाच्या वेवसायाक नागरिकांनी बरें सहकार्य केल्यार पंचायतींत वेगळ्याच प्रकारचो आदर्श निर्माण जावंक शकता अशें तांणी सांगलें.
उदकास्रोत खात्याचे अधिकारी अनिल फडते हांणी जलसंवर्धना खातीर आशिल्ल्या खुबश्या येवजण्यांची म्हायती ह्या वेळार दिली. येवपी काळांत आपले फुडले पिळगे खातीर उदकाचें नियोजन करपाचें आसल्यार सैमीक पांवड्यार आशिल्ल्या स्त्रोतांची राखण करात आनी ताका लागून ह्या खात्या वरवीं उपलब्ध आशिल्ल्या येवजण्यांचो फायदो घेयात अशी मागणी अनिल फडते हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
