भांगरभूंय | प्रतिनिधी
निकृश्ट दर्जाचें काम आयलें मुखार; रस्तो कितलीं वर्सां तिगतलो? लोकांनी उप्रासायलो प्रस्न
उसगांव: सत्तरी म्हालांत कांय म्हयन्यां पयलीं सरकारान भौशीक रस्तो बांदकाम विभागा वतीन सत्तरी म्हालांत विवीध गांवगिऱ्या वाठारांनी हॉटमिक्स रस्ते केल्ले. पूण हे केल्ले रस्ते कितले दीस तिगतले होच सद्या लोकांक प्रस्न पडला. सत्तरी म्हालांत विधानसभा वेंचणुके पयलीं, जाल्यार कांय कडेन चार-पांच म्हयन्यां पयलीं नवे हॉटमिक्स रस्ते केल्ले. पूण सत्तरींत गांवगिऱ्या वाठारांनी केल्ल्या रस्त्या विशीं प्रस्न उप्रासला. नव्या रस्त्यांचेर फोंडकुलां पडपाक सुरवात जाल्या. ताका लागून एकदां नवो हॉटमिक्स रस्तो केलो जाल्यार तो कितलीं वर्सां तिगतलो अशेंच चित्र सद्या गावगिऱ्या वाठारांनी दिसूंक लागलां.
आंबेडें, नगरगांव ते धावें मुखेल रस्तो ह्याच वर्सा नव्यान हॉटमिक्स केल्लो. पूण ह्या आंबेडें, धावें मार्गार सद्याचे घडयेक रस्त्या वयली खडी वयर येवंक लागल्या. हॉटमिक्स रस्त्यार घाल्ली डांंबरयुक्त खडी ल्हान स्वरुपांतल्या रस्त्यार थर एकठांय जावंक लगल्यात. आंबेडें, नगरगांव, धावें रस्त्यार खूबशे कडेन ल्हान खडी वयर येवंक लागल्या. कांय सुवातींनी फोंडकुलांय पडूंक लागल्यांत. ताका लागून नव्या रस्त्यांचे आयुश्य कितलें हो प्रस्न सद्या पडूंक लागला.
सरकारान लोकांचो पयसो कसोय वापरचो आनी सर्वांगी उदरगतीच्या नांवान लूट करपाची अशेंच प्रकार ह्या रस्त्या वयल्यान दर्शयतात.
हे विशीं आंबेडेंचे कृशी अधिकारी अनिरुद्ध जोशी हांणी म्हणलें, आंबेडें नगरगांव ते धावें गांवां मेरेनचो रस्तो कांय म्हयन्यां पयलींच केल्लो. धावें रस्त्यार फोंडकुलां पडपाक सुरवात जाल्या. रस्त्यार खडी येत आसा, आनी तातूंतल्यान ल्हान खडयेचो थर एकठांय जावंक लागला. ताका लागून रस्तो विभागाक नेमको कशे तरेचो रस्तो करूंक जाय आशिल्लो? हें एक कुवाडेंच जालां.
लोक विवीध कराच्या माध्यमांतल्यान सरकारी तिजोरेंत पयशे भरतात. त्या पयशांचो विनीयोग करतना एखादें काम दर्जात्मक जावंक जाय. पूण रस्तो करतना सदांच निकृश्ट कामाचें दर्शन घडत आसता. हाचेर सरकाराचें कसलेंच नियंत्रण नाशिल्ल्याचें स्पश्ट जाता. पयलींच्या काळांत रस्ते केले उपरांत खूबशीं वर्सां तिगताले. पूण फाटल्या पंदरा वर्सांत मात वाळपय शारांत तशेंच गांवगिऱ्या वाठारांनी खूबशे फावटी केल्ल्या रस्त्यार रोखडींच फोंडकुलां पडिल्ल्याचें दिसून येता. नवो रस्तो करीत जाल्यार तो वर्सभरांतूच व्हांवून गेलो अशें समजा अशें जोशी हांणी म्हणलें.
वाळपय-पणजी मार्गार हाती कडेन रस्त्या वयलें डांबर वयर येत आसा, आनी थंय फोंडकुलांनी सुवात घेवपाक सुरवात केल्या. नवो रस्तो केले उपरांत तो निदान आठ वर्सां तरी तिगूंक जाय. पूण सत्तरी म्हालांत फाटल्या कांय वर्सांत केल्ल्या रस्त्यांचेर सेगीत हॉटमिक्स काम करचें पडटा. सरकारान संबंदितांचेर खर कारवाय करूंक जाय अशी हांगासरल्या लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
