भांगरभूंय | प्रतिनिधी
-धारखण्यां उज्यांत काजू बागायतीची 5 लाखांची लुकसाणी
वाळपयः सत्तरी म्हालांत फाटल्या दोन दिसांत उजो लागपाच्यो चार घडणुको घडल्यो. हातूंत काजू बागायतींची मोट्या प्रमाणांत लुकसाणी जाल्या. धारखळ-धावे वाठारांत काजू बागायतीक उजो लागून सुमार पांच लाखांची लुकसाणी जाल्या, जाल्यार केरी कॉम्प्युटर दुकानाक उजो लागून दोन लाख रुपयांचें लुकसाण जावपाची घडणूक घडली. वाघुरे आनी पिसुर्ल्यां खण वाठारांत उजो लागून जैवीक संपत्तीचें लुकसाण जालां.
वाळपय उजो पालोवपी दळा कडल्यान मेळिल्ले म्हायती प्रमाण, धारखण-धावे ह्या वाठारांत अंकुश कुडशेकार हांच्या काजू बागायतीक दनपारच्या वेळार उजो लागून सुमार पांच लाख रुपयांची लुकसाणी जाल्या. उजो पालोवपी दळाक हाची म्हायती मेळ्ळे उपरांत तांणी घडणूक सुवातेर वचून मोट्या प्रमाणांत मालमत्ता वाचोवपाक म्हत्वाचें योगदान दिलें. मजगतीं, 5 लाख रुपयांचें लुकसाण जाल्ल्याचो अदमास आसा. उजो पालोवपी दळान 10 लाख रुपयांची मालमत्ता वाटायल्या.
केरी सत्तरींत कॉम्प्युटरच्या दुकानाक उजो
केरींत देवेंद्र गांवस हांच्या कॉम्प्युटर दुकानाक अचकींत उजो लागून सुमार दोन लाख रुपयांची लुकसाणी जाल्या. ही घडणूक सोमारा फातोड्डेर घडली. उजो पालोवपी दळान उजो पालोवपाचो यत्न केलो. पूण दुकानांतली झेरॉक्स प्रिंटर मशीन, कॉम्प्युटर, लॅपटॉप हांची मोट्या प्रमाणांत लुकसाणी जाल्या. लुकसाणीचो आंकडो सुमार दोन ते अडेज लाख आसा.
देवेंद्र गांवस आनी कुटुंबियांनी उजो पालोवपाक फायर एस्टिगुनशचो वापर केल्ल्यान सुमार 2 लाख रुपयांची मालमत्ता वाटायली.
मजगतीं मेळिल्ले म्हायती प्रमाण वाघुरे वाठारांतल्या काजू बागायतीक आनी रानां संपत्तीक उजो लागलो. वाळपयच्या उजो पालोवपी दळाक हे विशीं म्हायती मेळ्ळे उपरांत तांणी घडणूक सुवातेर धांव घेवन उजो पालोवपाचो यत्न केलो. आयतारा रातीं उसरां मेरेन उजो पालोवपाचें काम सुरू अाशिल्लें.
तेच प्रमाण पिसुर्ल्याअ फोमेंतो कंपनीच्या वाठारांत उजो लागपाची घडणूक घडली. हातूंत रानां संपत्तीची मोट्या प्रमाणांत लुकसाणी जाल्या, अशी म्हायती उजो पालोवपी दळाच्या जवानांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
