भांगरभूंय | प्रतिनिधी
-राज्य सरकाराची केंद्रीय पर्यावरण मंत्रालयाक विनवणीवाळपयः अस्तंत घाटांतल्या पर्यावरण संवेदनशील वाठारांतल्यान 21 गांवांक वगळपाची विनवणी राज्य सरकारान केंद्रीय रान पर्यावरण आनी हवामान बदल मंत्रालयाक केल्या. सत्तरी तालुक्यांतल्या वट्ट 51 गांवांतल्यान फकत 12 गांवांचो तातूंत आस्पाव जाला.
केंद्रीय पर्यावरण मंत्रालयान जारी केल्ल्या अस्तंत घाट पर्यावरण संवेदनशील वाठाराच्या मसुद्यांत राज्यांतले 108 गांव आनी वट्ट 10,247 चौखण किलोमीटर क्षेत्रफळ हांचो आस्पाव केला. केंद्रीय पर्यावरण मंत्रालयाच्या मसुद्याचो अभ्यास करपा खातीर राज्य सरकारान भारताच्या रान सर्वेक्षणाचे आदले म्हासंचालक डॉ. देवेंद्र पांडे हांच्या अध्यक्षते खाला वांगडी समितीची स्थापना केल्ली. हे समितीन पर्यावरण संवेदनशील वाठारांत येवपी गांवांचो नियाळ घेतला आनी 21 गांव वगळावपाची शिफारस केल्या.
हे समितीन केल्ल्या शिफारशी उपरांत राज्य सरकारान केंद्रीय मंत्रालयाक 21 गांव वगळपाची विनवणी केल्या. तातूंत भिरोंडें, भूंयपाल, खोतोडें, अंसोलें खडकी, खोतोडें, कुमारखण, खडकी, केरी ,सातोडें, शिरोली, वेळूस ह्या बारा गांवांचो तातूंत आस्पाव आसा.
सगळ्या गांवांचो इको सेन्सिटिव्ह झोनांत आस्पाव केल्लो. हाका लागून सत्तरी तालुक्या कडल्यान सगळ्या गांवांक ह्या झोनांतल्यान वगळचे अशी मागणी जाली. हे खातीर एक खाशेली बसका घडोवन हाडली. हे बसकेंतल्यान सगल्या गांवांक वगळावचे, नाजाल्यार गांवचे उदरगतीचेर आनी गांवच्या नागरिकांच्या जिविताचेर मर्यादा येतली अशें स्पश्ट केलें. सत्तरी तालुक्यांतल्या सगळ्या बारा ग्रामपंचायतींनी ताका विरोध केल्लो, पूण विरोध आसून लेगीत 51 गांवांतले फकत 12 गांव वगळ्ळ्यात.
——————
परतून संघर्श जावपाची शक्यताय
मजगतीं, ह्या पर्यावरण संवेदनशील वाठारांत 51 गांवांचो आस्पाव केला. त्या सगळ्या गांवांच्या नागरिकांचे जिणेचेर मर्यादा येवपाची भिरांत आसा, तशेंच गांवचे उदरगतीक आडमेळीं येवपाची आसा. नवे प्रकल्प येवपाचें बंद जातले. हाका लागून वाळपय पालिका सभाघरांत जाल्ले सत्तरी तालुक्याच्या शेतकार आनी भूंयपुतांचे बसकेंत सगल्या गांवांक वगळावपाची अशी विनवणी केल्ली. ह्या वेळार रानजीव संरक्षण समितीचे पदाधिकारी हाजीर आशिल्ले. सत्तरी म्हालांतल्यान खर विरोध ह्या मसुद्याक केल्लो. हो मसुदोच रद्द करचो वा सत्तरी म्हालांतल्या ज्या गांवांचो आस्पाव इको-सेन्सिटिव्ह झोनांत केला ती सगलीं गांवां वगळावची अशी मागणी केल्ली.
—————–
सगल्या पंचायतींतल्यान विरोधाचो थाराव
दोन म्हयन्यां पयलीं सत्तरी म्हालांतल्या बाराय पंचायतींतल्यान खासा ग्रामसभांचे आयोजन केल्ले. ह्या ग्रामसभेंत इको सेन्सिटिव्ह झोनाक खर विरोध जाल्लो. हे विशींचो थाराव घेवन तो पंचायत संचालनालयाक सादर केल्लो. ताका लागून हाका सगल्या गांवांचो विरोध आसा हे स्पश्ट जाल्ले. अशें आसतनाच हो विरोध मानिनासतना मसुद्याचा अभ्यास करपा खातीर समितीन फक्त 12 गांवांचो विचार केला. ताका लागून हेर गांवांचेर अन्याय जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
