भांगरभूंय | प्रतिनिधी
भांगरभूंय । प्रतिनिधी
वाळपयः पांच वर्सां पिराये सकयल्ल्या भुरग्यांक पोलिओ डोस दिवपा खातीर आयतारा जाल्ले पल्स पोलिओ कार्यावळींत सत्तरी तालुक्यांतल्या 2793 भुरग्यांक डोस दिले. वाळपयच्या सरकारी सामाजीक भलायकी हॉस्पिटलांतल्यान मेळिल्ले म्हायती प्रमाण वाळपयचें बायल आनी भुरगीं कल्याण खात्याचें कार्यालय, आंगणवाडी सेविका आन मजतनीस तशेंच भलायकी खात्याच्या कर्मचाऱ्यांनी भुरग्यांक डोस दिवपाचे काम केलें.
भुरग्यांक पोलिओ डोस दिवपा खातीर वेगवेगळ्या पांवड्यार पूर्व तयारी केल्ली. सकाळी 8 वरां सावन डोस दिवपाक सुरवात केली. दरेक शाळा. ग्रामीण भलायकी केंद्राच्यो इमारती हांगा डोस दिले. ज्या बायलांक भुरग्यांक घेवन पोलिओ डोस केंद्रांत येवप शक्य नाशिल्लें तांच्या भुरग्यांक तांच्या म्हऱ्यांत वचून डोस दिले अशें वाळपय हॉस्टिटलाचो वैजकी अधिकारी डॉ विकास नायक हाणे सांगलें.
सत्तरी तालुक्यांत जायते कडेन आशिल्ल्या चिरे खणींत स्थलांतरीत मजूर काम करतात. तांच्या ल्हान भुरग्यांक लागींच्या केंद्रात घेवंन येवपाक सांगिल्लें. मात ते आयले ना. ताका लागून भलायकी खात्याच्या कर्मचाऱ्यांनी ते रावतात थंय वचून भुरग्यांक डोस दिवपाचें काम केलें. खंयचेंय भुरगें पोलिसो डोसा पसून वंचीत रावचें न्हय हे खातीर सगली जतनाय घेतिल्ली अशें डॉ नायकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
