भांगरभूंय | प्रतिनिधी
वाळपयः सुरवेच्या पावसांत घशघश्यांतल्यान व्हांवपी उदकांतल्यान फातर पडपाची शक्यताय आशिल्ल्यान सत्तरी तालुक्यांतल्या सगळ्या घसघश्यांचेर वचपाक रानां खात्यान बंदी घाल्या. फुडलो आदेश येय मेरेन ही बंदी लागू उरतली आनी ते मेरेन कोणेंच घशघशांचेर वच्चें न्हय अशी सुचोवणी रान खात्यान जारी केल्या. आदेशाचें उल्लंघन करून घशघशांचेर कोणूय दिसल्यार कडक कारवाय करपाची शिटकावणी रानां खात्यान दिल्या.
चड म्हायती प्रमाण, सत्तरी तालुक्यांतले जायते घशघशे फामाद आसात. पावसाच्या दिसांनी दोंगरातल्यान कोसळपी घशघशे आनी ताची मजा घेवपाक जून, जुलय, ऑगस्ट, सप्टेंबर ह्या चार म्हयन्यांत व्हड प्रमाणांत सैम मोगी ह्या वाठारांत येतात. शेळपे, करंजोळे, कुमठोळ, चरावणे, हिवरे, सालेली, पाली, सुर्ला, नानेली अशा जायत्या घशघशांचेर व्हड प्रमाणांत लोक येतात. खास करून शेनवार आनी आयतारा व्हड गर्दी आसता.
अंदूं वेळा पयलींच मान्सून दाखल जाल्ल्यान व्हड प्रमाणांत पावस पडलो. ताका लागून घशघशे व्हांवपाक लागल्यात. येवपी कांय दिसांत आजून व्हड प्रमाणांत घशघशे व्हांवपाची शक्यताय आसा. हाका लागून सत्तरी तालुक्यांतल्या सैमाक आनी घशघशांक व्हड प्रमाणांत नागरिक भेट दिवपाची शक्यताय आसा. सुरवातेच्या काळांत घशघशांचेर न्हांवप आनी मजा करप धोक्याचे आसता. हाची गंभीरतायेन दखल घेवन रानां खात्यान सत्तरी तालुक्यांतल्या सगळ्या घसघश्यांचेर वचपाक बंदी घाल्या. हे संबंदी आदेश जारी केलां. हो आदेश खरपणान पाळपाची सुचोवणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
