भांगरभूंय | प्रतिनिधी
पणजी : सत्तरींतल्यान एक धक्को दिवपी घडणूक मुखार आयल्या. रानांत कासाक गेल्ल्या दोगां तरणाट्यां मदल्या एकल्याक फार लागून मरण आयलें. हे विशीं पुलिसांक म्हायती मेळटांच तांणी रोखडोच ताका वाळपय हॉस्टिपलांत व्हेलो. तपासणी केले उपरांत पुलिसांनी ताका मरण आयिल्ल्याचें सांगलें. हेमंत देसाय (अडवय- सत्तरी) अशें मरण आयिल्ल्याचें नांव. ताची कूड पोस्टमार्टमा खातीर जीएमसींत धाडल्या. ताचे वांगडा आशिल्लो अभिजीत देसाय (अडवय- सत्तरी) हाका वाळपय पुलिसांनी ताब्यांत घेवन तपास सुरु केला.
मजगतीं, पोरूं डिसेंबराच्या निमण्या सप्तकांत वाळपयच्या पाटवळ रानांत इश्टा सयत कासाक गेल्ल्या समद खान (२१) ह्या तरणाट्याक फार लागून मरण आयिल्लें. कासाक वचपाक बंदी असूनय नेम मोडिल्ल्यांचेर वाळपय पुलिसांनी धडक कारवाय सुरू केल्ली. चिंचमळ आनी लागसारच्या शंभरां परस चड घरांची झडती घेतली. तेच प्रमाण जायत्या जाणांच्यो जापो नोंद केल्यो. उपरांत बाबू उमर संगर (३८, चिंचमळ म्हाऊस), गौस नूर अहमद (म्हाऊस) आनी अल्ताफ (नाणूस) हांकां पुलिसांनी अटक केल्ली. जानेवारींत आनीक दोगांक अटक केल्ली. उपरांत प्रकरण निवळ्ळें आनी सगल्यांची जामिनाचेर सुटकाय जाली. मात आतां हें नवें प्रकरण वयर सरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
