भांगरभूंय | प्रतिनिधी
भांगरभूंय । प्रतिनिधी
वाळपयः सत्तरी अर्बन मल्टिपर्पज सहकारी सोसायटीक सहकार खात्याचो अंदूचो उत्कृश्ट सहकारी संस्था पुरस्कार फावो जाला. पणजे सहकार भवनांत आयज (बुधवार
29 फेब्रुवारी) जावपी खाशेले कार्यावळींत सोसायटीक व्हो पुरस्कार भेटयतले. पुरस्कार मेळल्ले खातीर संचालक मंडळान खोस उक्तावन सोसायटीच्या वावराक मेळल्ली ही पोचपावती आसा अशें म्हणलां.
गोंय सरकाराचे सहकार खातें सहकार मळार बरी कामगिरी करून दाखोवपी संस्थेक दर वर्सा पुरस्कार दिता. सहकार निबंधक अरविंद बुगडे हाणे सोसायटीच्या संचालक मंडळाक पत्र धाडून सोसायटीक पुरस्कारा खातीर वेंचून काडिल्ल्याची म्हायती दिली. फाटल्या पंचवीस वर्सांत सोसायटीन राज्यांत वेगवेगळ्या सुवातांनी आपले फाटे सुरू करून गरजूं लोकांक अर्थीक मजत दिवपाची सेवा दिल्या. सोसायटीचो कारभार पारदर्शक आशिल्ल्यान सोसायटीचे भागधारक आनी गिरायकां मदीं विस्वासाचे नातें तयार जाला. हे फाटभुंयेर सोसायटीची पुरस्कारा खातीर निवड केल्या अशें बुगडे हाणे म्हणलां.
सोसायटीचो प्रामाणीकपणान काम करपी कर्मचारी वर्ग, संचालक मंडळान सोसायटीचो केल्लो विस्तार आनी उदरगत तशेंच पारदर्शक कारभाराक लागून सहकार मळार सोसायटीन तयार केल्ली आपली प्रतिमा हाका लागून व्हो पुरस्कार फावो जाला अशें सोसायटीच्या वांगड्यांनी सांगलां. फाटल्या 25 वर्सांच्या सोसायटीच्या येसात भागधारक, गिरायक, संचालक मंडळाचें भरपूर योगदान आसा. तांच्या सहकार्याक लागून सोसायटीची भरभराट चल्ल्या आनी ताची पावती पुरस्काराच्या रुपांत मेळ्ळ्या अशें सोसायटीचो अध्यक्ष वासुदेव परब हाणे सांगलें.
सोसायटीची उदरगत जावपाक जायत्या घटकांचो हात आसा. गिरायक आनी भागधारकांनी विस्वास दवोरल्ल्यान सोसायटी सध्या उंचेल्या पांवड्यार पावल्या. संचालक मंडळ हाचे फुडें नव्या दमान लोकांची सेवा करपाचो वावर करतली अशेंय ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
