भांगरभूंय | प्रतिनिधी
शेतकार आनी बागायतदारांची मागणी : वाळपय कार्यालयांत कनिश्ठ अभियंत्याची नियुक्ती करची
वाळपय : सत्तरी म्हालांत जायत्या न्हंयांचेर उदकास्रोत खात्यान उबारिल्ल्या उपाय येवजण्यांची सुदारणा करची. ह्या येवजण्यांचीं यंत्रणां पोरणीं जाल्यांत. हाका लागून जायते फावटीं हीं यंत्रणां इबाडिल्ल्यान हाचो फटको शेतकारांक जावपाक लागला. हाका लागून नवीं यंत्रणां बसोवन सरकारान शेतकारांक सहकार्य करचें अशे तरेची मागणी शेतकार भावांनी केल्या. तशेंच वाळपय उदकास्रोत खात्याच्या कार्यालयांत अभियंतांचो उणाव आशिल्ल्यान ताचो फटको कामाचेर बसपाक लागला. हाका लागून खात्यान नव्या अभियंत्यांची बेगोबेग वेवस्था करची अशी मागणी शेतकारांनी केल्या. सत्तरी म्हालांतल्या दोनूय आमदारांनी हाचे कडेन विशेश लक्ष घालचें अशी बागायतदारांनी केल्या.
उपसा येवजणेचीं यंत्रणां आदलीं
मजगतीं, मेळिल्ले म्हायती प्रमाण, सत्तरी म्हालांतल्या सगल्याच न्हंयांचेर उदकास्रोत खात्यान उदक आडयात, उदक जिरयात हाचे खाला बांद बांदल्यात. बांदांतल्यान व्हडा प्रमाणांत उदकाचो सांठो सुरू जालो. हें साठयिल्लें उदक बागायतींक उपलब्ध करचो हाचे खतीर उपसा येवजण चालीक लायली. जायत्या वर्सां आदीं ह्यो येवजण्यो उबारिल्ल्यो. सध्या ह्या येवजण्यांचीं यंत्रणां पोरणीं जाल्यांत. हाका लागून सेगीत तातूंत इबाड जातना दिसता. हाचो सरळ फटको शेतकार आनी बागायतदारांक बसपाक लागला. कारण ह्या येवजण्यांवरवीं व्हडा प्रमाणांत शेती बागायतींनी उदकाची पुरवण जायत आसता. पावसांत उदक बांदांनी सांठोवन उपरांत येवजण्यां वरवीं ताची पुरवण शेतांक, बागायतींक जायत आसता. जायते फावटीं पंप इबाडटा. यंत्रणां इबाडप, अश्या कारणांक लागून ह्यो येवजण्यो बंद पडटात आनी उदकाची पुरवण जायना. हीं यंत्रणां वेळार दुरुस्त जायनाशिल्ल्यान उदका पुरवण प्रक्रियेचेर परिणाम जायत आसता. हाचो सरळ फटको बागायतदारांक बसत आसता, अशें समजलां.
दुरुस्ती ना जावपा फाटलीं कारणां
उपसा येवजणेचीं यंत्रणां जायते फावट इबाडटात. हीं यंत्रणां आदलीं आशिल्ल्यान तीं दुरुस्त करपाक बरोच वेळ लागता. तांचे इबाडिल्ले भाग वेळार मेळनात. हाका लागून यंत्रणां पंदरा दीस बंद दवरचीं पडटात. हाचो सरळ फटको बागायतदारांक बसतूच आसता. हाका लागून हीं यंत्रणां बदलून ते सुवातेर नवीं यंत्रणां बसयल्यार परत परत दुरुस्ती करपाचो वेळ येवचो ना. हीं आदलीं यंत्रणां बदलून ते सुवातेर नवीं यंत्रणां बसयल्यार बागायतदारांक वेळार उदक मेळपाक शकता. हाका लागून सरकारान नवीं यंत्रणां बसोवन दिवचीं अशी मागणी बागायतदार आनी शेतकारांनी केल्या.
मजगतीं, हे येवजणे वरवीं सत्तरी म्हालांतल्यो जायत्यो पडींग जमनी पीक घेवपाक लागल्यात. त्या जमनींचेर जायत्यो लागवडी केल्यात. अश्या जमनींक वेळार उदकाची पुरवण जावप गरजेचें आसता. डिसेंबर, जानेवारी ,फेब्रुवारी ,मार्च ,एप्रिल ह्या म्हयन्यांत वेळार उदक मेळचें अशी बागायतदारांची मागणी आसा. हाका लागून उदकास्रोत खातें सरकारान सक्रीय करचें, ना जाल्यार हाचो फटको बागायतदारांक सोंसचो पडटलो. सत्तरींत सुपारी, नाल्ल आंबो, काजू ,केळी अशो विवीध लागवडी केल्यात. ह्या भागांतल्यान व्हडा प्रमाणांत उत्पादन जायत आसता.
वाळपय कार्यालयांत फकत दोनूय अभियंते
मेळिल्े म्हायती प्रमाण, वाळपय उदकास्रोत कार्यालयांत फकत दोनूच कार्यकर्ते कार्यरत आशिल्ल्याचें समजता. तांतल्या एका अधिकार्याचो अंजुणे धरण प्रकल्पांत ताबो आशिल्ल्यान ते वाळपय कार्यालयांत चड वेळ दिवपाक शकनात. हाका लागून हांगा एकूच अभियंतो कार्यरत आशिल्ल्याचें पळोवपाक मेळटा. हो अभियंतो रातचो उसरां मेरेन काम करता. एका अधिकार्याक लागून शेतकारांच्या कामाचेरूय परिणाम जातना दिसता. जायते फावटी यंत्रणां इबाडटात तेन्ना अभियंत्याच्या उणावाक लागून ताचो कामाचेर परिणाम जाता. हाका लागून उदकास्रोत खात्याच्या मंत्र्यांनी वाळपय कार्यालयांत उण्यात उणें तीन अभियंत्यांची पुराय वेळ नियुक्ती करची अशी मागणी बागायतदार आनी शेतकारांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.