भांगरभूंय | प्रतिनिधी
वाळपयः सत्तरींत रानदुकर आनी माकड बागायतीचें लुकसाण करपाक लागल्यात. जाचो बागायती धनयांक बरोच फटको बसता. रानां खातें आनी शेतकी खात्यान एकठांय येवन ह्या रानवटी जनावरांचेर उपाय करचे अशी मागणी थळाव्या बागायती धनयांनी केल्या.
साट्रें, नगरगांव, सत्तरीचे देमू गांवकार हांणी सांगलें, रानदुकरांनी बागायतींतल्या माडयांची नासधूस केल्या. एकेच रातींत सुमार 100 माडयो नश्ट केल्यात. इतले कश्ट करून लागवड केल्ल्यो माडयो नश्ट जाल्ल्यान खूब लुकसाण सोंसचें पडलें अशें तांणी सांगलें. रानदुकर ताच्या बागायतीची नासधूस करतात अशीं कागाळ ताणें संबंदीत अधिकाऱ्यांक केल्ली पूण कसलीच कारवाय करूंक ना अशें तांणी सांगलें.
रानवटी जनावरांकडल्यान संरक्षण दिवन शेतकारांक पिकांची लागवड आनी पिकावळ करपाक प्रोत्साहन दिवप गरजेचें आसा. अशें तरेन बागायतीचें लुकसाण जाल्यार शेतकार लागवड करप बंद करतले अशें कांय थळाव्यांनी सांगलें. फाटल्या धा वर्सांत सत्तरी तालुक्यांत नाल्लाच्या उत्पादनांत व्हड प्रमाणांत उणाव आयिल्ल्याची म्हायती कांय जाणांनी दिली. रानां खातें आनी शेतकी खात्यान एकठांय येवन हे बाबतींत कांय उपाय करचे अशी मागणी बागायतदारांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
