भांगरभूंय | प्रतिनिधी
भांगरभूंय । प्रतिनिधी
केरी- सत्तरीः केरी पंचायत वाठारांतल्या पेळावदा रावण हांकां रानदुकरांनी काटेकणगां, कारांदें, सुरण पीक खावून उत्पादकांचें व्हडा प्रमाणात अर्थीक लुकसाण केलां. पीक हाता कडेन आयिल्ले कडेन रानदुकरांनी ताची नासाडी केल्ल्यान शेतकारांचे कश्ट फुटक गेल्यात.
पेळावदा रावण हांगच्या लक्ष्मी नारायण सावंत, वामन सावंत, प्रकाश गांवस, मुकूंद मोरजकार, गुरूदास मोरजकार हांणी रोवल्ल्या काटेकणगांची आनी हेरा पिकाची रानदुकरांनी नासाडी केल्या. कांय दिसां आदी रानदुकरांनी आमच्या शेतांत येवन काटेकणगां आनी कारांदे खाऊन उडयले. ताका लागून आमचें व्हड लुसकाण जालां. जून म्हयन्यांत आमी काटेकणगांची लागवड केल्ली. रानदुकरांनी केल्ल्या लुकसाणेची म्हायती आमी वाळपयच्या कृशी कार्यालयाक म्हायती दिल्या. मात तांणी अजून ताची पळोवणी केली ना अशें सावंत हिणे सांगलें.
रानवटी जनावरांनी पिकाचें लुकसाण करप आता सदचेंच जालां. दिसाच्या वेळार खेतीं बागायतीचें लुकसाण करतात. रात जातगीर रानदुकर लुकसाण करतात. गवे, मोर हांकाय लागून शेतकारांचें लुकसाण जाता. सरकार लुकसाण भरपाय दिवपाचें आस्वासन दिता मात कृशी खात्या कडल्यान कसलीच कारवाय जायना अशें लक्ष्मी सावंत हिणे सांगलें. पोरूं लेगीत काटेकणगांचें लुकसाण जाल्लें. कृशी खात्याक आमी लुकसाण भरपाय मेळची म्हणून अर्ज केल्लो. मात अजून मेरेन कसलीच मजत मेळी ना अशें तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
