भांगरभूंय | प्रतिनिधी
भांगरभूंय । प्रतिनिधी
वाळपयः रिव्होलुशनरी गोवन्साचे (आरजी) सत्तरी तालुक्यांतले पदयात्रे विशीं सत्तरीच्या उपजिल्होधिकाऱ्यान मंगळारा दनपारां सुनावणी घेतली मात कसलोच निर्णय दिलो ना. पदयात्रा आडावपाचो प्रकार राजकारण्यांच्या सांगण्या वयल्यान सरकारी अधिकाऱ्यांनी केलो तरी सत्तरी तालुक्यांतली ही 100 किलोमिटरांची ही पदयात्रा येशस्वी करपाचो निर्धार आरजीचो फुडारी मनोज परब हांणे उक्तायला. हिम्मत आसल्यार ही पदयात्रा आडोवन दाखयता अशें आव्हान तांणी आपल्या विरोधकांक दिलां. वाळपयचो आमदार आनी भलायकी मंत्री विश्वजीत राणे आनी तांची घरकान्न पर्येची आमदार दिव्या राणे हांचेर तांणे खर टिका केली.
आरजीच्या वकिलान उपजिल्होधिकारी न्यायालयांत बाजू मांडले उपरांत कार्यालया भायर मनोज परब प्रसार माध्यमां कडेन उलयतालो. सत्तरी तालुक्यांतल्या वाळपय आनी पर्यें मतदारसंघात फाटले विधानसभा वेंचणुकेंत आरजीक धा हजारां परस चड मतां मेळ्ळ्यांत. ताका लागून आमचे पदयात्रेक विरोध करपाचो राजकी यत्न जातले हें आमकां खबर आशिल्लें. सरकारी यंत्रणेचो वापर करून पदयात्रा आडावपाचो जो प्रकार जाला ती सामकी खेदाची गजाल. लोकशायेंत दरेकल्यान आपलें मत मांडपाची मेकळीक आसा. आमचे पदयात्रेंत वांटेकार जाल्ल्यां कडेन कसलींच शस्त्रां नाशिल्लीं. म्हादयचें अस्तित्व तिगोवन दवोरपा खातीर पदयात्रा काडल्ली मात तिच्या माध्यमांतल्यान सत्तरींत आमचो पक्ष वाडीक लागतोलो हे भिंरातेन सरकारी यंत्रणेचे मजतीन हो राजकी खेळ रचला असो आरोप परब हाणे केला.
उपजिल्होधिकाऱ्यान पदयात्रा बंद करपाचो निर्णय दिल्यार ताका उच्च न्यायालयांत आव्हान दितले. ताका लागून संबंदीत अधिकारी रडाराचेर येवपाक शकतले अशें ताणे सांगलें. सत्तरी तालुक्यांतल्या सगल्या पंचायतीचे सरपंच आनी वाळपय पालिके वतीन उपजिल्होधिकाऱ्यांक सादर केल्ल्या निवेदना विशीं विचारलें तेन्ना हें निवेदन सामकें हासपा सारकें आसा. पदयात्रेक लागून कसले तरेची कायदो आनी सुवेवस्थेची परिस्थिती तयार जातली, असो प्रश्न परब हांणे केलो.
आमच्या पक्षान आतां मेरेन कसलींच लोकशाय विरोधी कामां केल्लीं नात. पदयात्रा काडली म्हणून सरकाराक भिरांत दिसता जाल्यार ती दुर्दैवाची गजाल आसा.. हाच्या फुडें आपलो पक्ष सत्तरी तालुक्यांत जावपी बेकायदेशीर गजालींचेर चड नदर दवोरतलो. निवेदन दिवपी सगल्या सरपंचाच्या बेकायदेशीर कामां वयल्यान तांकां घेरपाचो आमचो यत्न आसतलो अशें ताणे सांगलें.
उपजिल्होधिकारी निर्णय दिना तो मेरेन पदयात्रा बंद दवोरतले. मात सत्तरी तालुक्यांतल्या शंबर किलोमिटरांची ही पदयात्रा कोणूच आडावपाक शकचो ना. उपजिल्होधिकाऱ्यान निर्णय दितगीर कायदेशीर सल्लो घेवन फुडलो निर्णय घेतले अशें मनोज परब हांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
