भांगरभूंय | प्रतिनिधी
पणजी : सत्तरी म्हालांत दोन म्हयन्यां फाटीं जाल्ले फारपेट प्रकरणाचो तपास करपाक पुलिसांक येस आयलें. नंदकुमार आपटे हांच्या घरा कुशीक आशिल्ल्या स्टोअरांतल्यान वाळपय पुलिसांनी पिस्तोल जप्त केलें.
नंदकुमार हांणी आपूण सोरो पियेतल्यांक भेकडावपाक खातीर फारपेट केल्ल्याची कबुली पुलिसांक दिली. आपटे हांचे कडेन शस्त्र दवरपाचो परवानो नाशिल्लो अशेंय पुलिसांनी सांगलें.
उत्तर गोंय पुलीस अधीक्षक हरीश मडकयकार हांणी, पुलिसांनी ‘फॉरेन्सिक सायन्स लॅबोरेटरी (एफएसएल) टीम’चे मजतीन पोडोशेंच्या झरीवाडो हांगचे गृहनिर्माण वसणुकेंत ‘कोम्बिंग ऑपरेशन’ केलें.
धनी आपटे हांचे हाजेरींत केल्ली झडती मजगतीं, अधिकार्यांक कांयच दुबाव येवपा सारकें सापडूंक ना. तशेंच, पुलिसांक घराशेजरा एक बंद स्टोअररूम दिसलो. जेन्ना आपटेन उगडो करपाक न्हयकार दिलो तेन्ना पुलिसांचो दुबाव आनीक वाडलो आनी तांणी दार मोडून घातलें.
स्टोअररूमांत, पंगडाक एक निळ्या रंगाची बॅरल सांपडली. तातूंत एक लांब बॅग आशिल्ली. तातूंत एक पिस्तोल लिपयिल्लें, अशी म्हायती पुलीस अधीक्षकांनी दिली. उपरांत आपटे हांकां प्रस्न विचारले उपरांत तांणी आपणें गोळी मारिल्ल्याचें कबूल केलें आनी घडिल्ल्या प्रकाराची म्हायती पुलिसांक दिली.
चवकशी मजगतीं आपूण रातीं उसरां मेरेन सोरो पियेवन बसपी आनी हेर बेकायदेशीर गजालींनी गुंथिल्ल्यांक भेकडावपाक गुळी मारिल्ल्याचें तांणी पुलिसांक सांगलां, अशें पुलीस अधीक्षक मडकयकार हांणी सांगलें. पुलिसांनी कलम ३५(३) खाला आपटे हांकां नोटीस दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
