भांगरभूंय | प्रतिनिधी
खदूळ उदकाक लागून दाबोस उदक प्रकल्पाचेर परिणाम; साबार गांवांनी उदक पुरवणेचेर परिणाम
भांगरभूंय । प्रतिनिधी
वाळपयः फाटल्या तीन दिसां सावन सत्तरी म्हालाच्या विवीध भागांनी पियेवपाच्या उदकाचो उणाव निर्माण जाला. काल तिसऱ्या दिसाय अशीच स्थिती आशिल्ली. ताका लागून खूबशा गांवांर टँकरा वरवीं उदका पुरवण करताले. मात उदक पुरवण उणी पडिल्ल्यान थळाव्या लोकांनी खर तिडक उक्तायल्या. मजगतीं, फाटल्या तीन दिसां सावन घाटमाथ्यार व्हड प्रमाणांत पावस पडिल्ल्यान दाबोस उदक प्रकल्पाक येवपी उदक खदूळ आशिल्ल्यान उदक शुद्दीकरण करपतना आडखळी येवपाक लागल्यात. ताका लागून जाय तशें उदक शुद्ध जायना. हाका लागून पियेवपाच्या उदकाची पुरवण करपाक आडखळी येतात, अशें अधिकारी सुत्रांचें म्हणणें आसा.
मेळिल्ले म्हायती प्रमाण, जुस्त चवथीच्या दिसांनी सत्तरी म्हालांत पियेवपाच्या उदकाचो उणाव निर्माण जाला. फाटले दोन दीस साबार वाठारांनी टँकरां वरवीं उदका पुरवण केली. दोन दिसां सावन वीज पुरवण परतून परतून खंडीत जाता ताका लागून उदक पुरवण करप शक्य नाशिल्ल्याचें भौशीक उदक पुरवण खात्याच्या अधिकाऱ्यांचें म्हणणें आशिल्लें. मात काल दीसभर अशीच स्थिती आशिल्ली. हे संबंदान अदीक चवकशी केली तेन्ना कळ्ळें, दोन दिसा सावन घाटमाथ्यार व्हड प्रमाणांत पावस पडटा. ताका लागून न्हंयेंत खदूळ उदक येता. हें उदकाचेर शुद्दीकरण प्रक्रिया करतना साबार आडखळी निर्माण जाल्यात. खदूळ उदक शुद्द करपा खातीर यंत्रणेचेर ताण येता. ताका लागून लोकांक शुद्द उदकाची पुरवण करतना मर्यादा येता, अशें अधिकारी सुत्रांनी सांगलें.
यंत्रणा अद्ययावत करपाची लोकांची मागणी
चवथीच्या दिसांनी उदका पुरवण बंद आसा. एके वटेन चवथ आनी दुसरे वटेन उदक ना. ताका लागून थळावे लोक बेजार जाल्यात. भौशीक उदक पुरवण खात्यान दाबोस उदक प्रकल्पाची यंत्रणा अद्ययावत करची, अशी मागणी साबार लोकांनी केल्या. ह्या संबंदांत सत्तरी म्हालांतल्या दोनूय आमदारांनी विशेश लक्ष दिवन हे संबंदांत विचार करचो, अशेंय लोकांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
