भांगरभूंय | प्रतिनिधी
वाळपय: फाटल्या कितल्याशाच दिसां सावन झडपी पावसाक लागून भात-शेतांचें व्हडा प्रमाणांत लुकसाण जालें. तशेंच सुपारी, केळीं, आंबो लागवडीचेंय लुकसाण जालां. सरकारान भात-शेतांची लुकसाण भरपाय दिवपाची घोशणा केल्या. सत्तरी म्हालांतल्या ह्या विशींचें सर्वेक्षण वाळपय विभागीय कृषी कार्यालया वतीन केलां. आतां मेरेन होंडा, सालेली, गुळेली, ठाणे अश्या खुबश्या भागांनी सर्वेक्षण पुराय जालां. ह्या वाठारांत व्हडा प्रमाणांत भात, शतांचें लुकसाण जालां. पुराय सर्वेक्षण पुराय जाले उपरांत हे विशींचो अहवाल वरिश्ठ खात्याक सादर करतले, अशी म्हायती विभागीय कृषी कार्यालया कडल्यान मेळ्ळ्या.
मजगतीं, विभागीय कृषी अधिकारी विश्वनाथ गांवस हांचे म्हायती प्रमाण, आतां मेरेन सत्तरी म्हालांतल्या होंडा, सालेली, ठाणे, गुळेली आनी हेर भागांनी भात शेतीचें सर्वेक्षण केलें. ह्या गांवांत भात, शेतां आडवीं पडलीं. हाका लागून भात उत्पादकांक अंदूं पीक मेळप कठीण जातलें. तांकां व्हडा प्रमाणांत लुकसाण जालें. सरकारान भात-शेतांची लुकसाण भरपाय दिवपाची घोशणा केली. ते प्रमाण सर्वेक्षण हातांत घेतलां, अशें गांवस हांणी स्पश्ट केलें. सत्तरी म्हालांत भात शेतीचें उत्पादन तुलनात्मक नदरेन उणें आसा. हाका जायतीं कारणां जरी आसलीं तरी कांय भात उत्पादक सेगीते भात शेतीची लागवड करतात. अंदूं मात पावसान ह्या उत्पादकांची आस्त सोंपोवन उडयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
