भांगरभूंय | प्रतिनिधी
रक्कम बेगीन मेळना जाल्यार आंदोलन करपाची शिटकावणी
वाळपय: दिवचल म्हाला उपरांत आतां सत्तरी म्हालांतल्या दूद उत्पादकांक फाटल्या चार म्हयन्यां सावन दुदाची आधारभूत रक्कम मेळूंक ना. हाका लागून खुबश्या जाणां मुखार आडमेळीं निर्माण जाल्यात. दिवचलच्या दूद उत्पादकांनी आंदोलनाची शिटकावणी दिल्या. हाका लागून सत्तरी म्हालांतल्या दूद उत्पादकांनी आंदोलन करपाची शिटकावणी दिल्या. ही रक्कम बेगोबेग खात्याचेर जमा करपाची मागणी दूद उत्पादकांनी केल्या.
हे विशीं चड म्हायती प्रमाण, सत्तरी म्हालांत व्हडा प्रमाणांत दुदाचें उत्पादन जायत आसता. खुबश्या दूद उत्पादक संस्थां वरवीं दूद उत्पादकांक सरकाराचे येवजणे खाला आधारभूत रक्कम मेळतूच आसता. मात्र फाटल्या चार म्हयन्यां सावन दूद उत्पादकांक हाचो लाव जावंक ना. जायते फावटीं बँकांनी वचून हे विशीं चवकशी केली. मात आजूनय ही रक्कम खात्यां जमा जावंक ना. हाका लागून दूद उत्पादकांनी खर तिडक उक्तायल्या. अशे तरेन दूद उत्पादकांनी कशें जगचें अशे तरेचो प्रस्न उत्पादकांनी केला. सरकारान ही रक्कम बेगोबेग बँक खात्यांनी जमा करपाची मागणींय उत्पादकांनी केल्या.
सत्तरीच्यो सुमार ६० परस चड दूद उत्पादक संस्था गोंय दूद उत्पादक संघाक दूद उत्पादन करून ताची पुरवण करतात. शेकड्यांनी शेतकार हातूंत कार्यरत आसात. सत्तरी म्हालांतल्यान व्हडा प्रमाणांत दुदाचें उत्पादन जायत आसता. कामधेनू येवजणे खाला खुबश्या जाणांनी हे विशीं खरेदी केल्या आनी दूद उत्पादन वाडोवपाक म्हत्वाचें योगदान दिलां. सरकाराचे येवजणे खाला दूद उत्पादकांक आधारभूत किंमत मेळतूच आसता. मात फाटल्या चार म्हयन्यां पसून ही रक्कम आजूनय मेळूंक ना. सेगीत आधारभूत किंमत वेळार खात्यांत जमा जायनाशिल्ल्याचो दूद उत्पादकांचो दावो आसा. हाका लागून सरकार दूद उत्पादकांक अशे तरेन त्रास करतात, असो दावो दूद उत्पादक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
