भांगरभूंय | प्रतिनिधी
वाळपयः सत्तरी तालुक्यांत काले आनी जात्रा सुरू जाल्यात. ह्या वेळार जुगारांचे खेळ सुरु जातले. जाका लागून लाखांनी रुपयांची उलाढाल जातली. ह्या जुगाराक थळाव्या लोकांचो विरोध आसलो तरी संबंदीत खात्याच्या अधिकाऱ्यांच्या आदारान जुगार चालूच आसता. काले आनी जात्रांनी जुगार खेळपाक दिवचो न्हय अशी मागणी नागरिक करतात. हे खातीर कांय गांवांतले नागरिक बेगीनूच मुख्यमंत्री डॉ. प्रमोद सावंत हांकां मेळून वाडत आशिल्ल्या जुगाराचेर तांचे कडेन चर्चा करतले. तेच प्रमाण काल्यांत जुगार खेळपाक सुरवात करपी लोकां आड कारवाय करतले अशें कांय तरणाट्यांनी सांगलां.
देवळांच जुगाराचे कंत्राट घेतात
मजगतीं, ज्या गांवांनी काले आनी जात्रा मनयतात, थंय जुगाराचे अड्डे सुरु करपा खातीर देवूळ समिती कंत्राट घेतात अशें उक्तडार आयलां. हाका लागून गांवांनी जुगाराचे अड्डे रातभर चलतात आनी लाखांनी रुपयांची उलाढाल जाता. म्हत्वाचें म्हणल्यार गोंयकार आनी भायले नागरिक जुगार खेळपाक खास येतात. देवळाक येणावळ मेळोवपाच्या हेतान देवूळ समित्यो अशा गजालींक तेंको दितात अशें कळ्ळां. हे विशीं जायत्या नागरिकांनी खर तिडक उक्तायल्या.
जुगार अड्डे बंद करात
मजगतीं, अशा जुगाराचे अड्डे बंद करचे अशी मागणी सत्तरींतल्या जायत्या नागरिकांनी हाचे पयलींय केल्ली. पूण पुलीस हाचेर आड नदर करतात असो आरोप नागरिकांनी केलां. कांय नागरिकांनी गांवांनी जुगार खेळ सुरू जाल्यार थेट पुलीस हेल्पलायन नंबराचेर कागाळ करपाचो निर्णय घेतला. हाका लागून अंदूं काले, जात्रांनी जुगार सुरू केल्यार तांकां आडमेळ्यांक तोंड दिवचें पडटलें अशी शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
