भांगरभूंय | प्रतिनिधी
-अमृतमहोत्सवी वाडदिसा निमतान भोवमान सुवाळो
पणजीः सतीश नायक हांणी मुल्यांधिश्टीत पत्रकारिता करून पत्रकारीता धर्म सांबाळ्ळो. समाजाक मार्गदर्शन करपी गजालींचेर तांणी भर दिलो. तांची पत्रकारिता कायम यादींत उरतली. आपूण राजकारणांत अपघातान आयलो. दिल्ली जापसालदारकी स्विकारली. त्या काळांत पत्रकारांचे सहकार्य, मार्गदर्शन लाबले. पत्रकार सतीश नायक हे कायम यादींत उरतले. आपल्या राजकी, सामाजीक वाटचालींत पत्रकारांचें व्हड योगदान आसा, अशें केंद्रीय पर्यटन राज्य मंत्री श्रीपाद नायक हांणी सांगलें.
ज्येश्ठ पत्रकार सतीश नायक हांच्या अमृतमहोत्सवी वाडदिसा निमतान सहकार मित्रमंडळ गोंय अानी ज्येश्ठ पत्रकार संघटणा हांच्या जोड पालवान गोंय चेंबर्स ऑफ कॉमर्सच्या सभाघरांत आयोजीत केल्ल्या भोवमान सुवाळ्यांत केंद्रीय मंत्री श्रीपाद नायक मुखेल सोयरे ह्या नात्यान उलयताले.
ह्या वेळार मंत्री रोहन खंवटे अध्यक्ष सुवातेर आशिल्ले. माचयेर सहकार मित्रमंडळाचे अध्यक्ष धर्मा चोडणकार, ज्येश्ठ पत्रकार गुरूदास सावळ, सचीव सुभाष नायक, सतीश नायक आनी तांची घरकान्न मीना नायक हजर आशिल्लो. ह्या वेळार मुखेल सोयऱ्यांचे हस्तुकीं शाल, श्रीफळ, यादस्तीक भेटोवन सतीश नायक हांचो भोवमान केलो.
सतीश नायक हांचें पत्रकारितेंत व्हड योगदान आसा. तांच्या अणभवांतल्यान खूब कितें शिकपाक मेळ्ळे. तांणी नाती जोडलीं आनी सांबाळ्ळी, अशें मंत्री रोहन खंवटे हांणी म्हणलें.
सतीश नायक हे प्रामाणीक पत्रकार. तांणी पत्रकारितेक पुराय न्याय दिलो, अशें प्रा. सुभाष वेलिंगकार हांणी म्हणलें.
ह्या वेळार गुरूदास सावळ, वामन प्रभू, सुहासिनी प्रभुगांवकार, पांडुरंग गांवकार, शशिकांत पुनाजी, उल्हास नायक ह्या पत्रकारांनी आपल्यो भावना उक्तायल्यो.
धर्मा चोडणकार हांणी प्रास्तावीक केले, सुभाष नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
