भांगरभूंय | प्रतिनिधी
‘सूराज अभियान’ची प्रशासना कडेन मागणी
पणजीः दसरो, दिवाळी आनी हेर सणांच्या वेळार पदार्थांनी जावपी भेसळीक आळाबंदा हाडपाची मागणी हिंदू जनजागृती समितीच्या समाजीक उपक्रमा खाला ‘सुराज अभियाना’न अन्न आनी वखदां प्रशासन संचालक श्वेता देसाय आनी अतिरिक्त जिल्होधिकारी गुरूदास देसाय हांचे कडेन केली. निवेदन सादर करपाच्या वेळार शिश्टमंडळांत ‘सूराज अभियान’ चे समन्वयक सुचेंद्र अग्नी आनी वकिल रुपेश गावस हाजीर आशिल्ले.
सणांच्या वेळार पेडो, बर्फी, गुलाब जामून सारकिल्ल्या गोड पदार्थांची मागणी वाडटा. तिका लागून जायत्या सुवातींनी खव्यांत भेसळ करतात, मागीर भौशीक भलायकेक धोको निर्माण जाता. हाका आळाबंदा हाडपाक अन्न आनी वखदां प्रशासनान गोड पदार्थ तयार करपी दुकानांचेर अचकीत धाडी घालून नमुने चांचणी खातीर प्रयोगशाळेंत व्हरचे. भेसळ जाता अशें सांपडल्यार गुन्यांवकारांचेर खर कारवाय करची. भेसळी विशीं सगळे कडेन जागृताय जावंक जाय. बाजार वाठारांतल्या वेगवेगळ्या सुवातींनी गोड पदार्थांची चांचणी केंद्रां उबारचीं अशी मागणीय तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
