भांगरभूंय | प्रतिनिधी
नझीर खान: चिखली उपजिल्हो हॉस्पिटलाची उदरगत करपाचो सल्लो
वास्को: सड्यार 20 खाटींच्या हॉस्पिटलाची गरज आसा असो प्रस्न उप्रासावन समाजीक कार्यकर्ते नझीर खान हांणी हें हॉस्पिटल धवो हती जावपाची भिरांत उक्तायली. संबंदितांनी चिखली उपजिल्हो हॉस्पिटलाची उदरगत करपा खातीर यत्न करचे असो सल्लो तांणी दिलो. सड्यार बांदिल्ल्या आंतरराष्ट्रीय स्विमींग पुलाची अवस्था कितें जाली हें लोकांक बरें खबर आसा अशेंय तांणी म्हणलें.
नझीर खान हांणी काल (बुधवारा) घेतिल्ले पत्रकार परिशदेंत उलयताले. तांचे सयत एल्वीन आरावजो, आदले नगरसेवक संदेश मेस्ता, साजीद खान हाजीर आशिल्ले.
मुख्यमंत्री डॉ. प्रमोद सावंत हांणी आमदार संकल्प आमोणकार आनी विवीध खात्यांच्या प्रतिनिधीं सयत बसका घेवन मुरगांव मतदारसंघांतल्या विकासकामांक चालना दिवपाचे निर्देश दिल्ले. तातूंत 20 खाटींचें हॉस्पिटल, मुरगांव किल्ल्याचें संवर्धन आनी सोबितीकरण तशेंच हेर विकासकामांचो आस्पाव आसा.
हे संबंदी नझीर खान हांणी म्हणलें, चिखली उपजिल्हो हॉस्पिटलांत फावोशे दोतोर, नर्स, उपकरणां, हेर कामगार वर्ग बी हांचो उणाव आशिल्ल्यान तें हॉस्पिटल पुराय तांकीन चलोवप शक्य जायना. त्या हॉस्पिटलांत सुविधा उपलब्ध करून दीत जाल्यार दुयेंतींक बरी सेवा मेळूंक शकता. ते खातीर थंय लक्ष दिवपाची गरज आसा. पूण आमदार संकल्प आमोणकार मुरगांव मतदारसंघांत 20 खाटींचें हॉस्पिटल बांदपा खातीर यत्न करतात. ताचे फाटलें प्रयोजन समजून येना. ताचो खरोच उपेग जातलो? हाचाे अभ्यास तांणी पयली करचो अशें नझीर खान हांणी म्हणलें.
सडा वाठारांत सात-आठ कोटी रुपया खर्च करून बांदिल्लो भोवउद्देशी मार्केट प्रकलप धवो हती जाला. ताचो वापर अजून सुरू जाल्लो ना अशेंय तांणी मुखार उलयतना म्हणलें.
नझीर खान हांणी सडा ते बायणांतल्या सी इमारती मेरेन बांदिल्लें अर्दवट अवस्थेंतलें युटिलिटी गटार, पावसाचें उदक व्हांवन वचपी गटार ह्या विशयांक हात घालो. सदर बांदकामांचें पयशे कंत्राटदाराक दिल्यात. पूण थंयचें काम अर्दवट आसा. ते संबंदी आमोणकार हांणी लक्ष घालपाची गरज आशिल्ली. तांणी कोळसो आनी प्रदुशण बंद करपाचें आस्वासन दिल्लें. पूण आतां तांणी यू टर्न घेतिल्ल्याचो दावो खान हांणी केलो.
सड्या वेल्या जीआरबी कॉलनीची दुरावस्था जाल्या. आमदार आमोणकार हांकां विरोध करपी कोण नाशिल्ल्यान ते प्रसिद्धी खातीर जाय तशें उलयत आशिल्ल्याचो दावो खान हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
