भांगरभूंय | प्रतिनिधी
लायन्स क्लब ऑफ चिखलीचें आयोजन
मुरगांव: लायन्स क्लब ऑफ चिखली बोगमाळोक झोन 1 प्रदेश 4 चे झोन चेअरपर्सन लायन शरद चोपडेंकार हांणी भेट दिली. ह्या वेळार क्लबा वतीन हेडलॅण्ड सडा बोगदा हांगा सरकारी शाळेंत चायल्डहूड कॅन्सर आनी शांतताये खातीर योगासना ह्या विशयाचेर शाळेंतल्या भुरग्यां खातीर जनजागृती कार्यावळीचें आयोजन केल्लें.
ह्या वेळार शालेय भुरग्यांक मार्गदर्शन करतना डॉ. सीताकांत घाणेकार हांणी शांतताये खातीर योगाचें म्हत्व आनी सामंजस्य आनी जिणेशैलीचे उपाय, भुरग्यांक निरोगी उरपा खातीर आनी कांक्र आनी हेर समस्यां सारक्या दुयेंसां पसून पयस उरपा खातीर बरी जिणेशैली हे विशीं म्हायती दिली.
मजगतीं, लायन्स क्लब ऑफ चिखली बोगमाळो झोन 1 प्रदेश 4 चे चेअरपर्सन लायन शरद चोपडेंकार हांच्या भेटीचें औचित्य सादून सुप्रिया गोविंद साखळकार, गीतांजली आर. सावंत, शरद पेडणेंकार आनी बसनगौडा एम. गौडर ह्या शिक्षकांचो शरद चोपडेंकार, डॉ. सीताकांत घाणेकार आनी अध्यक्ष लायन अर्नाल्ड बॅसिलियो डो रेगो हांचे हस्तुकीं भोवमान केलो.
शाळेच्यो मुख्याध्यापिका लिरा सौझा हांणी शिक्षकांनी केल्ल्या नोबॅल सेवे विशीं लायन वांगड्यांचें उपकार मानले. शाळेंत आयोजीत केल्ल्या कार्यावळी विशीं क्लबाची तोखणाय करून उपकार मानले.
झोन चेअरपर्सन लायन शरद चोपडेंकार हांणी लेगीत आपल्या उलोवपांत शिक्षक फक्त शिक्षकूच न्हय जालयार विद्यार्थ्यांचो इश्ट जावन आनी तांकां वैयक्तीक रितीन समजून घेवन कशी मजत करूंक शकतात हाचेर भर दिवंक जाय अशें सांगलें.
सुवाळ्याक सचीव लायन लिनू थॉमस, भांडारी लायन रायनेल कार्वेल्हो, क्लब अॅडव्हायझर अॅड. ग्लक डिसोझा, लायन वैभव च्यारी, डॉ. सॅवियो डिसोझा, लायन जॉर्जिना फिओला रेगो, लायन अशोक क्रिटिकी आनी लायन लिबी मेंडोसा हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
