भांगरभूंय | प्रतिनिधी
भांगरभूंय । प्रतिनिधी
वास्कोः सडा हांगा मेकळे सुवातेर चार वर्सां पयलीं हाडून वडयल्लो तरेक तरेचो कोयर येता त्या पावसाळ्या पयलीं काडपाचें उतर कोयर वेवस्थापन मंत्री बाबूश मोन्सेरात हाणे दिलां. हे सुवातेची पळोवणी केल्या उपरांत बुधवारा तिची पळोवणी केल्या उपरांत मुरगांव पालिके वतीन थंय राखण वण्टी बांदतले अशें ताणे सांगलें.
सडा हांगच्या कोयराचो प्रश्न मुरगांवचो आमदार संकल्प आमोणकार हाणे विधानसभेंत उपस्थीत केल्लो. त्या संबंदीन मोन्सेरात हाणे आमदार संकल्प आमोणकार, कोयर वेवस्थापन मंडळाचो लेविसन मार्टिन्स आनी हेर अधिकाऱ्यां वांगडा सडा सुवाते विशींची म्हायती घेतली. थंयचो कोयर उखलून व्हरपाची सूचोवणी ताणे अधिकाऱ्यांक केली.
सडा हांगा आशिल्ल्या कोयराचें वर्गीकरण करून उपरांत तो व्हरतले अशें आमोणकारान सांगलें. हे सुवातेर 2020 वर्सा कोयराचें वर्गीकरण करपी यंत्रणा बसयल्ली. ते उपरांत थंय जो कोयर पडून आशिल्लो ताचें वर्गीकरण केलें ना. ताका लागून तो थंय पडून आसा. मुरगांव पालिकेच्या कोयर कंत्राटदारान थंय कोयर हाडून वडयल्लो. तोय काय काडटले अशें मार्टिन्स हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
