सजीपीडीए नुस्ते मार्केटांत चिखलः उपाय करपाची नुस्तें विक्रेत्यांची मागणी
भांगरभूंय | प्रतिनिधी
मडगांव ः एसजीपीडीएच्या घाऊक नुस्ते मार्केटांत दर दिसा येवपी शेकड्यांनी गाडयो, तशेंच सध्या सुरु आशिल्ल्या व्हड पावसाक लागून एसजीपीडीए नुस्ते मार्केट चिखलान भरिल्लो आसा. ह्या घाणयारे उदकांतल्यान विक्रेते आनी गिरायकांक वाट काडीत वचपाची वेळ आयलां. एसजीपीडीएन हाचेर बेगोबेग उपाय काडचो अशी मागणी नुस्तें विक्रेत्यांनी केल्या.
सध्या घाऊक मार्केटांत घाण वास पातळिल्ल्यान भलायकेचे त्रास जावपाची शक्यताय आसा. मार्केटांत प्रवेश करपी वाहनां कडल्यान एसजीपीडीए वराक प्रवेश शुल्क घेतात, पूण मार्केटाची देखरेख आनी नितळसाण हांचे कडेन पुरायपणान दुर्लक्ष जाता अशें विक्रेते सांगतात. येरादारीक लागून ह्या वाठारांत फोंडकुलां तयार जाल्यात, तातूंत नुस्त्याचें उदक आनी पावसाचें उदक सांठला. ते खातीर एसजीपीडीएन उदकाचो निचरो करून बेगोबेग फोंडकुला भरची अशी मागणी विक्रेत्यांनी केल्या.
एसजीपीडीए मार्केटांतल्या नव्या इमारतीचें बांदकाम पुराय जालां तरी कांय सुविधा अजून उबारपाचे आसात. मजगतीं, एसजीपीडीएन ह्या परिस्थीतीचेर उपाय काडून नव्या इमारतीत नुस्त्याची विक्री बेगीनांत बेगीन सुरू करपाक परवानगी दिवची अशी मागणी थळाव्या नुस्तेकारांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
