भांगरभूंय | प्रतिनिधी
मुख्यमंत्र्याची पंचायतींक सुचोवणीः ‘स्वयंपूर्ण मित्रांची’ तुस्त
भांगरभूंय । प्रतिनिधी
पणजीः गोंयांतल्या सगळ्याच पंचायती आपापल्या पंचायत वाठारांतले शेती, दूद उत्पादक तशेंच नुस्तेकार शेतकारांची नोंद दवरची. तशेंच सरपंच आनी पंचांनी लक्ष घालून ह्या शेतकारां मेरेन केंद्र आनी राज्य सरकाराच्यो सगळ्यो येवजण्यो पावोवच्यो, असो उलो मुख्यमंत्री डॉ. प्रमोद सावंत हांणी मारला.
स्वंयपूर्ण गोंय कार्यावळी खाला शेनवारा व्हर्चुअल पद्दतीन घेतिल्ले परिशदेंत मुख्यमंत्री उलयताले. ह्या वेळार दर्जेदार कामगिरी केल्ल्या पंचायतींच्या कामांचो नियाळ घेवपी पुस्तिकेचें मुख्यमंत्री डॉ. सावंत हांचे हस्तुकीं प्रकाशन जालें. गोंयांतल्या सगळ्या पंचायतींनी ही पुस्तिका आपापल्या पंचायतींत दवरची. तिचो अभ्यास करचो आनी जे पंचायतींनी बरें उपक्रम चालीक लायल्यात, तशे तरेचे उपक्रम आपापल्या पंचायत वाठारांत चालीक लावचे, अशें मुख्यमंत्री डॉ. सावंत हांणी सांगलें.
गोंयांतले शेती, दूद उत्पादक तशेंच नुस्तेमारी करपी शेतकारां मेरेन केंद्र आनी राज्य सरकाराच्यो सगळ्यो येवजण्यो पावोवन सगळ्याच पांवड्या वयल्या शेतकारांक घटसाण दिवप गरजेचें आसा. ते खातीर सरपंच आनी पंचांनी फुडाकार घेवन आपापल्या वाठारांतल्या शेतकारांची आंकडेवारी पंचायतींत दवरप आनी त्या शेतकारांक विमो कार्ड, किसान क्रेडीट कार्ड, सॉयल कार्ड मेलोवन दिवप गरजेचें आसा, अशें मुख्यमंत्री डॉ. सावंत हांणी सांगलें.
गोंय सरकारान चालीक लायिल्ल्या स्वंयपूर्ण गोंय मोहिमेचें प्रधानमंत्री नरेंद्र मोदी हांणी खूब खेपे कवतूक केलां. खूबश्या राज्यांतल्या अधिकाऱ्यांनी गोंयांत येवन हे मोहिमेचो अभ्यास केला. केंद्र आनी गोंय सरकाराचे एकेय येवजणे पसून गोंयकार पयस उरचो ना, हाची पुराय खबरदारी घेवन येवजण्यो चालीक लायतात, अशें मुख्यमंत्री डॉ. सावंत हांणी सांगलें.
मजगतीं, गोंयांत कांय दिसां आदीं आंतरराष्ट्रीय चित्रपट महोत्सवाची सांगता जाली. सध्या पोरणें गोंया सेंट फ्रान्सीस झेवियर हांचें पवित्र कूड प्रदर्शन सुरू आसा. तातूंत पर्यटन मोसम आशिल्ल्यान लाकांनी पर्यटक गोंयाक भेट दितात. ताका लागून थळाव्या वेवसायिकांक व्हड अर्थीक लाव मेळटा, अशेंय मुख्यमंत्री डॉ. सावंत हांणी सांगलें.
‘स्वयंपूर्ण गोंय’ कार्यावळ न्हय, चळवळ
‘स्वयंपूर्ण गोंय’ कार्यावळ न्हय, जाल्यार चळवळ आसा. हे खाला नेमिल्ल्या स्वयंपूर्ण मित्रांनी घेतिल्ले मेहनतीक लागून खाचीकोनशांतल्या लोकां मेरेन पावून लोकांची उदरगत करपाक सरकाराक येस मेळ्ळां, अशें मुख्यमंत्री डॉ. प्रमोद सावंत हांणी सांगले. फुडारांत ही मोहीन फुडें व्हरचे खातीर आनीक नेटान काम करात, असोय उलो तांणी स्वयंपूर्ण मित्रांक मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
