भांगरभूंय | प्रतिनिधी
विश्वांत फकत दोन टक्के आशिल्या वैज्ञानिकां मदीं तिचो नंबर दुसरो…. आनी ही गजल आयचीच न्ही तर फाटल्या तीन वर्सांत ती हो नंबर तिगोवन आसा.
माथाळो वाचून अजाप जालें? सगल्यांचे दृश्टीन खूप बायलां आसतली जांका आम्ही गिरेस्त हे व्याखेंत बसोवंक शकतात; इंग्लण्डची राणी वा भौमानेस्त नीता अंबानी आनीक अशो कितल्योच. हय, आमी जे फुटपट्टीचेर गिरेस्तकाय मेजतात, थंय ह्यो बयलो फीट बसतात. पूण आज हांव जिचे विशीं तुमकां सांगूंक सोदतां, तिच्या बॅन्क खात्यांत कितले दुडू आसतले तें हांव नकळो. तरीपूण ती म्हजे दृश्टीन खरी गिरेस्त बायलमनीस.
तर जे व्यक्ती विशीं हांव तुमका सांगूंक सोदता तिचें नांव आसा डाॅ. संध्या शेणाॅय. ही डिपार्टमेंट ऑफ मटेरिअल सायन्स अॅण्ड इन्स्टिट्यूट ऑफ इंजिनियरींग अॅण्ड टेक्नोलाॅजी, श्रीनिवास युनिवर्सिटी, मंगळूरची मानेस्त प्रोफेसर आनी प्रिन्सिपल रिसर्च वैज्ञानिक.
आतां अशे पीएचडी झाल्ले प्रोफेसर सगले कडेन आसतात, तातूंत चड व्हड कितें असोय एक प्रश्न तुमगेल्या मनांत येवंक शकता आनी तो बरोबरय आसा. कित्याक म्हणल्यार आमगेल्या गोंय विद्यापीठ जांव वा हेर संस्थां मदीं शिक्षणाचे वेगवेगळ्या फाट्यांत खूब जाणांनी पीएचडी मेळयल्या. पूण डाॅ. शेणाॅय हिचें व्हडपण सांगचें जाल्यार जगातली नामनेची स्टॅनफर्ड युनिवर्सिटी (अमेरिका) हिचे दृष्टीन विश्वांत फकत दोन टक्के आशिल्या वैज्ञानिकां मदीं तिचो नंबर दुसरो…. आनी ही गजल आयचीच न्ही तर फाटल्या तीन वर्सांत ती हो नंबर तिगोवन आसा.
डाॅ. शेणाॅय हिचो जल्म 1987 सालांत कुंदापूर शारांत एका गौड सारस्वत कुटुंबांत जालो. ती मंगळूर विद्यापीठांत शिकतना धा पैकी धा गूण मेळोवपी गाेल्ड मेडलिस्ट विद्यार्थी. ते बगर कल्पना चावला यंग सायंटीस्ट अवाॅर्ड तिणें मेळयला. तिगेलो विशय सोंपो करून सांगपाचो म्हणल्यार उर्जा (एनर्जी)… आनी ती इबाडिल्या वस्तुं पसून मेळोवप. जी उर्जा वापरुंक मेळना ती मेळोवन ताचे पसून लायट तयार करप. जेणे करून एक व्हड शारांतलो लायटीचो उणाव भरून काडूंक जाता. तिगेले आयज मेरेन 67 रिसर्च पेपर्स उजवाडाक आयल्यात. तिका इबाडिल्ल्या वस्तूं पसून वीज निर्मिती करपाचें एक आंतरराष्ट्रीय पेटंटूय मेळ्ळां.
मात, एक गजाल मतींत दवरात, ती म्हणचे तिणें केल्लें काम इतले सोंपे भाशेंत आनी दोन-तीन वाक्यांनी सांगप शक्य ना. आनी तशे करून तिणें केल्ल्या कामाचेर अन्याय करपाची म्हाका इत्सा ना. तिका भारतीय प्रसारमाध्यमांनी, संस्थांनी फावो तो भोवमान दिल्लो नासलो तरी अशें म्हणूंक जाता की डाॅ. संध्या शेणाॅय आयज भारतीय बायलांचें नांव पुराय वैज्ञानिक विश्वांत गाजयता.
ती आमगेल्या देशाचे फुकट वचपी उर्जेचो चडांत चड वापर कसो करचो हाचे विशीं जागरुकपणान काम करता. अशे अश्टताशी बायलेक तुमी कितें म्हणटले? …. आमगेल्या देशांतली सगळ्यांत गिरेस्त बायल!
– दीपक पाणंदीकार
94238 89659
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
