भांगरभूंय | प्रतिनिधी
वाॅशिंग्टन, खबरां संस्था: अमेरिकेन संवसारांतल्या सगळ्यांत बळिश्ट देशांची वळेरी जाहीर केल्या. खंयचो देश बळिश्ट आनी आपलो देश खंयच्या नंबराचेर आसा हें जाणून घेवपाची लोकांक उमळशीक आसतली.
देशाचें बळगें वा सत्ता थारावपाक फकत ताच्या लश्करी बळग्याचो विस्तार न्हय तर हेर आयामांचोय विचार करचो पडटा. संवसारीक मळार देशाची लश्करी शक्त आनी अर्थीक समृद्धी हाच्या आदाराचेर हे वळेरेंतली सुवात थारायतात. आतां लेगीत सगळ्यांत मुखार आशिल्ल्या देशांची वळेरी तयार करतना अमेरिकन न्यूज कंपनीन पांच निकशांचेर निर्णय घेतलो. हातूंत देशाचें फुडारपण, अर्थीक प्रभाव, राजकीय प्रभाव, घटमूट आंतरराश्ट्रीय भागीदारी आनी लश्करी हांचो आस्पाव जाता.
हातूंत अमेरिकेचो नंबर पयलो आसा. ह्या देशाची अर्थवेवस्था व्हड आसून ती २७.९७ ट्रिलियन डॉलर आनी लोकसंख्या ३३.९९ दशलक्ष आसा. भारताचो शेजारी चीन हे वळेरेंत दुसरो नंबर मेळोवपाक येसस्वी जाला. चिनाची अर्थवेवस्था १८.५६ ट्रिलियन डॉलर आनी ताची लोकसंख्या १.४२ अब्ज आसा असो अदमास आसा.
युक्रेनाकडेन झुजपाक व्यस्त आशिल्लो रशिया हो देश तिसर्या नंबराचेर आसा. रशियेची अर्थवेवस्था १.९० ट्रिलियन डॉलर आनी ताची लोकसंख्या १४.४ कोटी आसा अशें म्हण्टात. जर्मनी चवथे आनी ब्रिटन पांचवे सुवातेर आसा. हे वळेरे प्रमाण जर्मनीची अर्थवेवस्था ४.७० ट्रिलियन आनी ब्रिटनाची अर्थवेवस्था ३.५९ ट्रिलियन आसा.
भारत बाराव्या नंबराचेर
भारत बाराव्या नंबराचेर आसा. बाराव्या नंबराचेर आशिल्ल्या भारताची अर्थवेवस्था ३.३९ ट्रिलियन डॉलर आसा. भारता परस एक सुवात फुडें इस्रायल ११ वे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
