भांगरभूंय | प्रतिनिधी
बायलां अब्जाधीशांच्या वळेरेंत भारत तिसरे सुवातेर
नवी दिल्ली, खबरां संस्था ः आयज दर एका मळार बायलां मुखार आसात. वेगवेगळ्या मळार बायलांनी उंचेल्या पदांचेर आपली खाशेली सुवात मेळयल्या. संवसारांतल्या गिरेस्त उद्देजकांच्या वळेरेंत जायत्या बायलांचो आस्पाव आसा. स्लिंगोन केल्ल्या एका सर्वेक्षणांतल्यान 2024 मेरेन संवसारभरांतल्या बायलां वेवसायिकांची वळेरी जाहीर केल्या.
पयली तीन बायलां कोण?
फ्रँकोइस बेटेनकोर्ट मेयर्स 80.5 अब्ज डॉलर संपत्ती सयत पयल्या क्रमांकाचेर आसा. फ्रँकोइस बेटेनकोर्ट मेयर्स ही L’Oréal कंपनीच्या संस्थापकाची नात. तिका कंपनीची संपत्ती वारसो म्हूण मेळ्ळी ताका लागून ती संवसारांतल्या गिरेस्त बायलांचे वळेरेंत आसा.
ज्युलिया कोच (आनी कुटुंब) 59 अब्ज डॉलर सयत दुसरे सुवातेर आसा. कोच इंडस्ट्रीजची बोर्ड वांगडी आसून पंगडाच्या कामांनी मुखेलपणान ती लक्ष दवरता. कोच इंडस्ट्रीज कंपनींत कागद तयार करपा पसून तेल शुध्दीकरण कारखाने आसात आनी ज्युलिया कोच हिणें ह्या सगळ्या उद्देगांत म्हत्वाचीं कामगिरी केल्या.
वॉलमार्टची अॅलिस वॉल्टन ही वळेरेंत तिसरे सुवातेर आसा. तिची वट्ट संपत्ती ५६.७ अब्ज डॉलर आसा.
पयल्या तीन गिरेस्त बायलां मदली दोन बायला फॅशन आनी किरकोळ वेवसायां कडेन संबंदीत आसा. बायल अब्जाधीशां खातीर दुसरो म्हत्वाचो निव्वळ संपत्तीचो उद्देग म्हळ्यार कॅसिनो. ह्या मळार बायलांची सरासरी 20.8 बिलिअन डॉलर संपत्ती आसा. ह्या उद्देगांतल्यो दोन बायलो म्हळ्यार मिरियम एडेलसन आनी डेनिस कोट्स आसा.
पयल्या 50 गिरेस्त बायलांच्या वळेरेंत फकत दोन बायलो लॉजिस्टिक मळार आसात. ह्या मळार बरो फायदो जाता अशें म्हण्टात. देखून हे वळेरेंत लॉजिस्टिक क्षेत्र तिसऱ्या क्रमांकाचेर आसा.
खंयच्या देशांत सगळ्यांत गिरेस्त बायलां?
फ्रांस 23 अब्ज डॉलराची संपत्ती घेवन मुखार आसा. म्हणजेच फ्रांसांत सगळ्यांत चड गिरेस्त बायलां आसात. फ्रांसाचे अर्थवेवस्थेंत मेरी बेस्नियर ब्युवालोट सारकिल्ल्या बायलांचो वांटो आसा.
दुसरे सुवातेर युनायटेड स्टेट्स आसा. ह्या देशाची सरासरी निव्वळ 16 अब्ज डॉलर आसा. ज्युलिया कोच आनी अॅलिस वॉल्टन ही मुखेल बायलां देशाचे अर्थीक उदरगतींत योगदान दिता. जाल्यार तिसरो क्रमांक भारताचो आसा. भारतांतल्या गिरेस्त बायलांची संपत्ती 12.3 अब्ज डॉलर आसा. सावित्री जिंदाल सारकिल्ली बायलां भारताची वाडत वचपी अर्थीक उदरगतींचे प्रतिनिधित्व करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
