सगळोच ‘काळो बाजार’

भांगरभूंय | प्रतिनिधी

सध्या गोंयांत नोकरी विकपाच्या प्रकरणांत घुस्पल्ल्या गिरेस्त दलालांचो विशय गाजता. हातूंत दादल्यां बरोबर बायलांचीय ‘समानताय’ दिसता. ताचें फाटलें कारण म्हणल्यार बायलमनीस आमकां फटोवची ना, असो पयशे देणाऱ्याचो विस्वास आसता आनी ताकाच तो फसता. पूण ह्या दलालांच्या जाळ्यांत सगळेच फसतात अशें ना, कांय जाणांक तांच्या बऱ्या नशिबान नोकऱ्यो मेळटात आनी नोकरे खातीर दिल्ले पयशे ते रोखडेच ‘भरून’ काडटात.
हे ‘भरून’ काडपी कर्मचारी, कामगार इतले दाट कातीचे जाल्ले आसतात, की तांचेर कायद्याची बडी मार वा वळखीची, तांकां ती दुखना. अशा कर्मचाऱ्यांक लागून प्रामाणीक कर्मचाऱ्यांचेंय नांव बदनाम जाता, कित्याक तर समाजाक वायट अणभव येतकच ते सगल्यांक एकाच तागडेंत जोखतात. हें दरेक मळार चल्लां.
फाटीं पुलीस उपअधिक्षकांचीं पदां एक ते देड कोटी रुपयांक विकपाक काडल्यांत अशी वावडी आशिल्ली. विरोधी पक्षांच्या फुडाऱ्यांनीय ताचेर आवाज काडून सरकाराक फुगार करपाचो यत्न केलो. ही गजाल खरी आसली आनी जर तर इतले पयशे मेजून कोणूय ह्या पदाचेर पावलो जाल्यार तो समाजा खातीर वावुरतलो काय आपले पयशे भरून काडपा खातीर? पुलीस खातें पयलींच कांय सुवार्थी, भ्रश्ट, भानगडींनी भरिल्ल्या व्यक्तीं खातीर फामाद आसा. तांचो ‘गॉड फादर’ बी आसलो जाल्यार ते कायद्याक लेगीत खोटायतात. तांकां कसलीच भिरांत आसना आनी लज लेगीत.
नोकरी विकपाच्या प्रकरणांत सध्या जांकां अटक जाल्या ते आयज ना फाल्यां सुट्टले. उपरांत तांचे फाटल्यान ज्या राजकारण्यांचो आशिर्वाद आसा ते ह्यो केशी सदळ करपा खातीर वावुरतले, धमकायतले आनी केशी जिखतले. न्यायालयाक पुरावो जाय आसता आनी तो जर तपास यंत्रणा एकठांवक शकलीं ना वा कोणे तांकां ते एकठांवपाक दिले नात जाल्यार कोणाची चूक करपाची?
एक गजाल खरी की लोकांक आतां ‘लाख’ म्हणटात ते सोंपें जाल्यात. सामकेच ना जाल्यार सोयऱ्या- दायऱ्यांक तरी बुड्डून हाडून ‘सरकारी नोकरे’ची तजवीज लोक करतात. इतले लोक सरकारी नोकरे फाटल्यान पिशे जातात. घडये ‘मेजा पोंदच्यान’ घेवन पगार दोब्रात करपाचोच तांचो हेत आसता. ताचेरच तांचो दोळो आसता. हे अशे लोक खंयचेय परिस्थितींत सरकारी नोकरी मेळोवपाचो यत्न करतात आनी तांकां उपरांत हे दलाल मेळटात. ते तांचे भकीक पडटात आनी आशिल्लो नाशिल्लो पयसो तांच्या बॉल्सांत घालतात.
हातूंतले कांय दलाल अशे आसतात जांकां दरेक मनशा फाटल्यान टक्केवारीन पयशे मेळटात. देखीक 15 लाखांची एक नोकरी विकली जाल्यार ताचेर 7 ते 10 टक्के. ताच्या वयल्या दलालाची टक्केवारी वेगळी आनी मागीर उरिल्ले सगळे पयशे जो ह्या सगळ्या नाटका फाटल्यान आसता ताका. तो आपलें आंग दाखयना आनी आमची तपास यंत्रणाय तांचे मेरेन पावना. ह्या दलालांनी तांचें नांव सांगल्यार लेगीत तपास यंत्रणां प्रसार माध्यमां कडेन तांचे विशीं ‘ब्र’ काडचे नात. हेच खातीर अशीं प्रकरणां तडीक लागतलीं बी म्हणटात ती फट गजाल. आमकां न्यायालयांचेर विस्वास आसा, पूण तपास करतल्यांचेर? तांकांय ह्याच ‘पड्ड्या फाटल्या’ मनशांनी कामाक बी लायिल्ले आसल्यार वा दुसरे कडेन बदली बी मेळोवन घेवपाक फावोर मारिल्लो आसल्यार ते तोंड उगडटले? ना!
जांचे कडेन काळो पयसो आसता वा लोकांक नागोवन पयसो केल्लो आसता, तांचे पयशे ह्या दलालांनी गिळ्ळे जाल्यार फरक पडना. पूण कश्टाचे पयशे आनी कोफ्रेंतल्यान रिणां काडून जर हांचे भकीक घालीं जाल्यार फरक पडटा. हे खातीर सामान्य लोकांनी हें मतींत दवरूंक जाय की हे दलाल नोकरेच्या सोदांत आशिल्ल्या आनी सरकारी नोकरेक आशेल्ल्या उमेदवारां कडल्यान पयलो हप्तो म्हूण चार ते पांच लाख रुपया घेवन ताची गुंतवणूक करतात. बँकेंत एफडी करतात वा हेर माध्यमांनी घालून ताचेर कळंतर मेळयतात. आयज पयशे दिले आनी फाल्यां नोकरी मेळ्ळी अशें केन्नाच जायना. ताका वर्सां लागतात. हाचे मदीं वेंचणुको येतात, तांच्यो आचार संहिता लागू जातात आनी हांचें निमित्त दिवन दलाल नोकऱ्यांचें उतर मुखार धुकळत रावतात. अशें करून अश्शींच पांच ते स वर्सां वतात आनी ह्या काळांत तांकां ह्या उमेदवारांनी दिल्ल्या पयशांचेर कितलो फायदो जाता ताचें गणीत करून पळोवप गरजेचें. सुमार 20 जाणां कडल्यान अशे पयशे घेतले जाल्यार, लाखांनी रुपयांच्यो गाडयो आनी विदेशांत भोंवडी करून येवप सामकें सोंपें. तांकां हे खातीर घाम गळोवचो पडना. फक्त चिकाणां करून लोकांक ‘तारखो’ दीत रावपाची कला तांचे कडेन आसता. तांचे फोटो मंत्र्यां वांगडा बी पळयिल्लो आसतकच आनी तांणी ते आदीं लोकांक नोकऱ्यो दिल्ल्यो आशिल्ल्याचें कानार पडटकच उमेदार तांकां कांयच म्हणपाक वचना. आयज अशे कितलेशेच उमेदवार आसतले जांणी ह्या दलालांक पयशे दिल्यात, पूण लोकलजे खातीर ते कागाळ करिनासतना रावल्यात. हाचोच तर ते फायदो घेतात. तशेंच कोणूच सामकोच जर पयशे परत दी म्हूण फाटीक लागलो जाल्यार पांच लाखांतले ताका पन्नास हजार पयलीं दिवप, स म्हयन्यांनी आनीक पन्नास दिवप अशे प्रकार चलतात. मागीर देणारो चित्ता ‘चल पांच लाखांतले इल्ले तरी पयशे परत मेळ्ळे, उरिल्ले खाता जाल्यार खावं’. आरे! तो पापया पयशेच खावपाक बशिल्लो आसता. कित्याक तर तांकां दुसऱ्यांक नागोवप आनी फटोवप म्हणल्यार कांयच न्हय कशें. तांकां मनीसपणूय आसना आनी काळिजूय. अशा दलालां कडेन संपर्क दवरप हो पयलीं म्हणल्यार मुर्खपणा. खरें तर लांच दिल्या म्हूण तांचेरय कायद्याची बडी बसप गरजेची.
मंत्र्यां वांगडा फोटू काडून हे दलाल लोकांक फटयतात असो सध्या सूर आयकूंक येता. पूण मंत्री वा राजकारणी कोणाकूय आपले लागीं येवंक दितात? तशें आशिल्लें जाल्यार ‘काळ्या बाजारांत’ल्या प्रकरणांत सांपडिल्ले दलाल मंत्र्यां वांगडा ‘फितां’ कापपाक बी कित्याक आसतात तर? अशाच राजकारण्यांच्या आशिर्वादान आमी आयज ‘मसुरी’ तांदूळ म्हूण रेशनाचो बड्डेलो तांदूळ ‘पॉलीश’ करून 75 रुपया कील खातात!!! जे मेरेन राजकारण आसा, ते मेरेन हें अशेंच चलपाचें! सगळोच काळो बाजार.

संजय बोरकार
9921343430