सगळीं सुखां मनाच्या समाधानांत

भांगरभूंय | प्रतिनिधी

पयशे आनी समाधान ह्यो एकाच नाण्याच्यो दोन बाजू. कारण शारिरीक जिणे खातीर जशी पयशांची गरज आसता तशीच मानसीक सुखा खातीर समाधानाची गरज आसता.

आयज आमी आमच्यो अपेक्षा आनी दुसऱ्यांच्यो अपेक्षा घेवन भोंवतात. तुमचे विचार परिस्थिती बरी करतात वा इबाडटात. जिणेंत येशस्वी जावपाक जाय जाल्यार मागीर सकारात्मक विचार करात. उपाय आपोआप येतलो. दुसरे व्यक्तींत खंयचोय बदल करपाचो आसत जाल्यार ताचो अर्दो बदल स्वता मदीं करचो पडटलो, अशें तुमकां दिसना. सुखी खीण आमकां खबर आसतात आनी तांचो आमी अणभव घेवपाचो आसता.
आजकाल ‘म्हाका समाधान जालां’ म्हणपी लोक खंय मेळटात? चुकूनच केन्ना तरी मेळटात! उपायांचें स्पश्टीकरण खंय बरयलां? उपाय म्हणल्यार मान्य करप. खरेंच संवसारांत कोण खुशाल आसा? पूण, जो समाधानी उरता तोच सुखी जातलो. जिणेंतली सगळ्यांत म्हत्वाची जोड म्हळ्यार समाधान. म्हाका दिसता, तें खंय मेळटा, ज्या उपायांनी मेळटा ते उपाय सोदप म्हत्वाचें.
एक सांगू तुमकां? म्हजें समाधान कितें, कित्यांत आसा तें अशें आमी स्वताक विचारपाक जाय आनी अशे तरेन आमी पुराय विस्वासान आमचो मार्ग तयार करपाक जाय. जियेवपाची कला जाणपी तो खऱ्या अर्थान समाधानी आसता. मनशान केन्नाच स्वताची तुळा दुसऱ्याच्या नशिबा कडेन, दुसऱ्याच्या सुखा कडेन करची न्हय. ताका मेळिल्ल्या गजालींत थोडें समाधान लेगीत मेळूंक जाय. जितले स्वताक समाधानी मानतले, तितलेंच समाधान जातलें.
समजा, जिणेंत आमी सगळ्यां कडल्यान कितें तरी वा दुसरें अपेक्षा करतात. ही म्हजी बायल, तिणें अशें वागचें, ही म्हजी धूव, तिणें अशें वागचें. कशें वागचें हाचेर कांय विचार वा येवजण्यो आमच्या मनांत तयार आसतात. सगळ्यांनी कशें वागचें तें आमी आमच्या मनांत चिंततात, येवजण तयार करतात. कोण आमच्या मना परस वेगळो वागता तेन्ना आमकां चिडचिडेंपण जाता. खरेंच समाधान कितलें अपेक्षा केल्लें आनी कितलें मेळ्ळें हाचेर आदारून आसता काय? मनाची लागवड करतना कांय सकारात्मक भावना, विचार आनी वृत्ती… हेंच आमी स्वता बदलपाक जाय. तुमचे भितरले भलायकेचेर लक्ष दिवन तुमकां आपोआप समाधान मेळटलें.
तकले वयलें मळब आस्वासन दिवपी आसल्यार पांयांक खरखरीत दिसता. आदार आनी प्रेरणा जाय हें खरें; पूण वास्तव म्हणल्यार आमकां जाय तितलो आनी जाय तेन्ना सदांच कोणूच आदार दिवंक शकनात. देखून आमी स्वताची प्रेरणा, आत्मविस्वास आनी आमच्या कामाचेर स्वताचो सोद घेवपाची वृत्ती वाडयली जाल्यार ताण आपोआप उणो जातलो… आनी आमकां समाधानाची जाणविकाय जातली.
दरेक मनीस खंयचे ना खंयचे तरेन समाधान सोदता. पयशे आनी समाधान ह्यो एकाच नाण्याच्यो दोन बाजू. कारण शारिरीक जिणे खातीर जशी पयशांची गरज आसता तशीच मानसीक सुखा खातीर समाधानाची गरज आसता. भौतिक जिवीत पयशांचेर आदारून आसता जाल्यार मानसीक सुख समाधानाचेर आदारून आसता. मन सुखी आसल्यार मागीर मनीस समाधानी जातलो आनी मन सुखी दवरप सदांच आमच्या हातांत आसता, हें आमकां कळना.
घर, बंगलो, गाडी, माडी हातूंत कांय जाणांक समाधान मेळटा. पूण, तें कायमस्वरूपी न्हय. गाडयेचें मॉडेल बदल्लां आनी बाजारांत नवे आकर्शक मॉडेल आयलां, तें आसपाक जाय. हो स्मार्टफोन नव्यान बाजारांत हाडला. म्हजे कडेन तो कित्याक नासचो? म्हणजे मन विचारांत गुंतलें. मजलो केन्ना बांदचो हाचो विचार म्हणून मन स्वताक थिरावंक दिना. ताका लागून मनाची अस्वस्थताय वाडटली. तातूंतल्यान अंतराचें समाधान कशें मेळटलें? भोंवतणीं दिसपी चकचकीतपण तुमच्या मनाची अस्वस्थताय वाडयतली.
म्हाका दिसता, जितले आमी स्वताक बदलतात, तितलेच आमी स्वताक सोदून काडटात. आमचें जिवीत गिरेस्त, समाधानी आनी अर्थपूर्ण जाता. आमका कितें केले उपरान समाधानी जाल्ल्या भशेन दिसता तें सोदून काडप म्हत्वाचें. जो स्वता स्वताक समाधानी मानता, तो केन्नाच दुसऱ्याच्या नशिबा कडेन, दुसऱ्याच्या सुखा कडेन तुळा करीना. ताका समाधानी जावंक जाय. पूण, मेळिल्लें पुरो अशें समजून मनीस समाधानान जियेल्लो जाल्यार ताका इतली व्हडली उदरगत करपाक मेळची नासली. समाधानांतल्यान प्रगती मेरेन जिणेचो प्रवास म्हणल्यार खरें समाधान. सुख वा समाधान आमच्या मनांतल्या विचारांचेर आदारून आसता, चड करून…, तें जाणून घेवप आमच्या हातांत आसता. आमी जितले सुखी वा समाधानी स्वताक समजतात, तितलेच आमी चड खोशी आनी समाधानी जावंक शकतात. ते परिस्थिती प्रमाण आमी आमची मनाची स्थिती बदलतात आनी समाधानाची भावना आपोआप सुरू जाता. आपल्याच हातांत आसता सगलें.
दरेकल्याक थोडें समाधान आसता; पूण आमकां तें दिसना. मागीर लोक तें मेळोवपाक अशेच धांवतात! ताका सोदपाक कस्तुरी हरणा भशेन धांवपाची गरज ना. सगळे भोग आमचीं सगळीं सुखां मनाच्या समाधानांत, मनाचे तृप्तीन सांठयल्ली आसतात. फक्त पळोवपाची गरज आसा. जाणविकाय जावपाक जाय आमका.

गौरी भालचंद्र
9422373926