भांगरभूंय | प्रतिनिधी
मुख्यमंत्री डॉ. प्रमोद सावंत : पर्पल फेस्ताचें दबाज्यान उक्तावण
भांगरभूंय । प्रतिनिधी
पणजी : सर्वसमावेशक गोंय, सर्वसमावेशक भारत करपाच्या उद्देशान गोंयांत पर्पल फेस्ताचें आयोजन करतात. हेच प्रेरणेन गोंयांतल्यो सगल्यो दर्यावेळो, इमारती दिव्यांग स्नेही करचे खातीर गोंय सरकार यत्न करता, अशें मुख्यमंत्री डॉ. प्रमोद सावंत हांणी सांगलें.
बिरेस्तारा पणजे आंतरराष्ट्रीय पर्पल फेस्ताच्या उक्तावण सुवाळ्यांत मुख्यमंत्री उलयताले. ह्या वेळार केंद्रीय समाज कल्याण मंत्री डॉ. विरेंद्र कुमार, राज्यमंत्री रामदास आठवले, मंत्री सुभाष फळदेसाय, खासदार सदानंद शेट तानावडे, गुरुप्रसाद पावसकार हाजीर आशिल्ले.
मुख्यमंत्र्यान सांगलें, प्रधानमंत्री नरेंद्र मोदी हांणी सबका साथ, सबका विकास ही घोशणा दिल्ली. ते प्रमाण देशभरांत दिव्यांसु केंद्रां उबारल्यांत. गोंयांत लेगीत अशें केंद्र उबारलां. ते वरवीं दिव्यांग व्यक्तींक गरजेचीं आशिल्लीं उपकरणां दितात. तशेंच तांची कुशळटाय विकसीत करचे खातीर प्रशिक्षण लेगीत दितात. ह्या केंद्रा वरवीं आमी गोंयांतल्या दरेके दिव्यांग व्यक्ती मेरेन पावपाचो यत्न करतात. केंद्र सरकाराच्या विवीध येवजण्यांक लागून दिव्यांगांक मजत करचे खातीर नव्यो एनजीओ मुखार सरतात.
महोत्सवा मजगतीं विवीध राज्यांच्या दिव्यांगजन आयुक्त कार्यालयांच्या आयुक्तांची बसका जातात. तातूंत सादर केल्ले विवीध पेपर राष्ट्रीय पांवड्याचेर वतले. पेपरांतल्या वेंचीक गजालीं वयल्यान दिव्यांगां खातीर धोरण तयार करतले. गोंय राज्य हें धोरण निश्चीत स्विकारतलें. ह्या महोत्सवाक संयुक्त राष्ट्रांनी (यूएन) तेंको दिल्ल्यान हो खऱ्या अर्थान आंतरराष्ट्रीय पांवड्याचेर पावला. सर्वसमावेशकता हें आमचें ध्येय आसा, अशें मुख्यमंत्री डॉ. सावंत हांणी सांगलें.
ते आदीं केंद्रीय मंत्री डॉ. कुमार हांणी पर्पल फेस्त हें दिव्यांगांक व्यक्त जावपाचें एक व्हड माध्यम आसा. हो महोत्सव दिव्यांगांक समान संद, सन्मान दिवपाचें काम करता. हे खातीर सर्वसमावेशकतेची भावना वाडटली, अशें तांणी सांगलें. सुभाष फळदेसाय हांणी सांगले, हो फक्त महोत्सव नासून एक चळवळ आसा. हे खातीर लोकांची दिव्यांगां विशीं आशिल्ल्याची मानसिकता बदलता, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
