भांगरभूंय | प्रतिनिधी
पणजी : फाटलीं दोन वर्सां सगल्यांत चड पर्यटक येवपी राज्यांचे वळेरेंत गोंय हेर राज्यांचे तुळेंत १२वे सुवातेर आसा. उत्तर प्रदेश पयले सुवातेर आशिल्ल्यान राजस्थान दुसरे सुवातेर आसा. बिहार आनी पश्चीम बंगाला सारकीं राज्यां पर्यटकांच्या आंकड्यांत गोंयां परस खूब मुखार आसात.
गोंयांत २०२३ आनी २०२४ ह्या दोन वर्सांच्या काळांत १.९० कोटी पर्यटक आयले. हातूंत १.८१ कोटी देशी जाल्यार ९.२० लाख विदेशी पर्यटकांचो आसपाव आशिल्लो. २०२३ वर्सा ८१.७५ लाख देशी आनी ४.५२ लाख विदेशी पर्यटक आयिल्ले, जाल्यार २०२४ वर्सा ९९.४१ लाख देशी आनी ४.६७ लाख विदेशी पर्यटक आयले. ह्या दोनूय वर्सांचे मेळून वट्ट १.९० कोटी पर्यटकां सयत गोंय १२वे सुवातेर आसा.
११२ कोटी देशी आनी विदेशी पर्यटक मेळून पयलें सुवातेर उत्तर प्रदेश आसा, ४१.२९ कोटी पर्यटकां सयत राजस्थान दुसरे सुवातेर, ३६.७१ कोटी पर्यटकां सयत गुजरात तिसरे सुवातेर, ३५.७८ कोटी पर्यटकां सयत महाराष्ट्र चोवथे सुवातेर आनी ३५.५९ कोटी पर्यटकां सयत पश्चीम बंगाल पांचवे सुवातेर आसा.
विदेशी पर्यटकां विशीं महाराष्ट्र ७० लाख पर्यटकां सयत पयले सुवातेर आसा. तशेंच दिल्ली सवे सुवातेर, तामिळनाडू सातव्या, केरळ आठव्या, बिहार णव्व्या, पंजाब धाव्व्या, कर्नाटक इकराव्या आनी गोंय १२वे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
