भांगरभूंय | प्रतिनिधी
आमचे इश्ट दामोदर उर्फ दामू नायक भारतीय जनता पक्षाचे गोंय प्रदेश अध्यक्ष जाले, आनी थळाव्या राजकारणांतले तांचे सुरवेचे दीस याद जाले. राजकारणांत दामू त्या वेळार सामको नवो आशिल्लो. दामू नायक हांच्या राजकारणांतलो सुमार तीन दसकांचो प्रवास सामको लागींच्या पळोवपी पत्रकारां मदीं हांव एक आशिल्ल्यान आयज तांणी भाजपाच्या प्रदेश अध्यक्षपदाच्या कदेलार बसपा मेरेन घेतिल्ली उडी खूबच समाधान दिवपी थारची. निश्ठेक फळ मेळना असो गैरसमज करून घेवन हांगासरल्यान ते वटेन आनी थंयसरल्यान हे वटेन अशो सेगीत उडक्यो मारपी खंयच्याय पक्षाच्या कार्यकर्त्यां खातीर हो एक आदर्श थारचो. दामू नायक हे सर्गेस्त मुख्यमंत्री मनोहर पर्रीकार हांचे तालमीत तयार जाल्ले गडे. पर्रीकारांनी सांगचें आनी दामू नायक हांणी आयकलें ना अशें केन्नाच जालें ना. पर्रीकार हांच्या सामक्या लागींच्या विस्वासांतले गडे आशिल्ल्यान राजकारणांतले खांचीकोनशें, कुटनिती हें सगलेच दामू नायक वेवस्थीत शिकले. विधानसभेंत एखाद्या प्रस्नाचेर वा विशयाचेर विरोधकांक अक्षरशा धारेर धरपी आसूं वा सरकार पक्षांत आसतना सरकाराचें समर्थन करपी आसूं, मनोहर पर्रीकार सामके विस्वासान तांचेर जापसालदारकी सोंपयताले. दिल्ली जापसालदारकी पुराय करून पर्रीकार हांची आपल्या वेली विस्वासार्हता कशी वाडटली हेंच दामू नायक हांणी सदांच पळयलें. मनोहर पर्रीकार हांचो विस्वास जिखप ही तशी सोंपी गजाल नक्कीच नाशिल्ली. जांकां ही गजाल जमली ना ती दामू नायक हांणी करून दाखयली, आनी फुडल्या राजकी प्रवासांत कठीण परिस्थिती कडेन संघर्श करतना तांकां ताचो फायदोच जालो अशें हांव म्हणन.
गोंयांतल्या भाजपाच्या राजकी प्रवासांतलो हांवूय एक साक्षिदार आशिल्ल्यान जांकां जें जमलें ना तें दामू नायक हांणी करून दाखयले. अशें म्हणटात राष्ट्रीय स्वयंसेवक संघाची फाटभूंय आशिल्ले डॉ. सुरेश आमोणकार, प्राचार्य लक्ष्मीकांत पार्सेकार हांचे सारक्यांची उदाहरणां दोळ्यां मुखार येतात, आनी दामू नायक तांचे खातीर आदर्श म्हूण उबे रावतात. तीन फावटी विधानसभा वेंचणुकेंत सेगीत हार घेवन लेगीत पक्षा खातीर तेच गतीन काम करप, लोकांचे टिके कडेन आडनदर करून आपल्या हातांत घेतिल्लें काम पुराय करपा कडेन लक्ष केंद्रीत करप ह्याे गजाली दिसतात तितल्यो सोंप्यो निश्चितूच न्हय. पूण दामू नायक सगल्यां परस वरचड थारले. तीन फावटी हार घेवन लेगीत मुख्यमंत्री, प्रदेश अध्यक्षांच्या मर्जीतलो एक कार्यकर्ता म्हूण रावप हें सोंपें नाशिल्लें. पक्षांतले कांय लोक कुचित्रीपणान उलयताले, हें आमी पत्रकार ह्या नात्यात आयकताले. पूण दामू नायक हांकां ताचे कांयच पडून वचूंक नाशिल्लें. उरफाटें तांणी संघटणेच्या कार्यांत चडांत चड वांटो घेवन ते सगल्यांच्याच लागींचे दामू जावन रावले. आयज हो सगल्यांचोच दामू गोंय प्रदेश भाजपाचो अध्यक्ष म्हूण त्या कदेलार बसला. दामू नायक हांचो हो प्रवास खंयच्याय पक्षाच्या कार्यकर्त्यां खातीर अभ्यास घेवपा सारको थारचो. 2012 आनी 2017 वर्सा हार जाले उपरांतूय पक्षनेतृत्वान तांचेरूच विस्वास दवरून 2022 वर्सा तांकां परतून उमेदवारी दिली तेन्ना खूबशा जाणांक अजापूच दिसलें.
तांच्या फातोड्डें मतदारसंघांत तिसरे फावटी ल्हानशा फरकान हारले उपरांत दामू सोंपलो अशेंच चित्र काडिल्लें. पूण म्हाका दिसता दामू नवे उमेदीन काम करीत रावलो. ते खातीर तांणी जी जिद्द आनी इत्साशक्त दाखयली ताका तर सलाम करचोच पडटलो. विजय सरदेसाय हांचे सारक्या बळिश्ट मनशान तर दामूक राजकी नदरेन सोंपोवपा खातीर कसलीच कसर सोडली ना. पूण दामू नायक ताका बदलो ना. फाटले विधानसभा वेंचणुकेंत जाल्यार दामू नायक हांकां आपूणच जैतिवंत जातलो हाचो इतलो आत्मविस्वास आशिल्लो की, आमच्या सारक्या इश्टांनी तांकां तुमकां खंयच्या खात्याची जापसालदारकी घेवपाक आवडटली असोय प्रस्न केल्लो. दामू नायक तिसरे फावटी हारले उपरांत आतां दामू नायक फुडलीं पावलां कसलीं उबारतले हे विशीं उत्सुकताय आशिल्ली. दामू नायक संगीत आनी नाट्यमळारूय अदीं मदीं आपली कला दाखयताले, ते खातीर पक्षकार्य करीत आसतना दामू त्या मळार निश्चितूच कितेंय करून दाखोवपाचो यत्न करतले अशे दिसतालें. पूण दामू हार मानपाक तयार नाशिल्लेच. दामू हें नांव तांच्या तीन हारी उपरांतूय पक्ष कार्यकर्त्यांच्या काळजांत अशें कोंरातिल्लें की संद येतकूच तांचे फाटल्यान ठामपणान उबे रावपाचो संकल्पूच तांणी केल्लो. गोंय प्रदेश अध्यक्षपदा खातीर नांवां खूब जाणांचीं आशिल्लीं. पूण आमच्या सारक्यांक जांणी दामूचो प्रवास लागींच्यान पळयला, तांचीच निवड योग्य थारतली अशें दिसतालें.
खासदार सदानंद तानावडे हांचो राजकी प्रवासूय आमी सामको लागींच्यान पळयला. पत्रकारितेच्या पांच साडेपांच दसकांच्या म्हज्या प्रवासांत अर्थांतच श्रीपाद नायक हांचे सावन आयचे दामू नायक हांचे मेरेन प्रदेश अध्यक्षांची जाल्ली निवड प्रक्रिया सामकी लागींच्यान पळयल्या. ह्या वेळार तागडी इतली वयर सकयल जाताली की सदानंद तानावडे हांच्या गळ्यांत परतून अध्यक्षपदाची माळ पडटली असो माहोल तयार जाल्लो. प्रदेशाध्यक्ष म्हूण सदानंद तानावडे हांणी केल्लें कार्य अर्थांतूच तोखणायेचेंच आसा. पूण निमाणें दामू नायक हांणीच बाजी मारली आनी ते बाजीगर थारले. फाटल्या तीन चार दसकांत गोंयच्या राजकारणांत आमी पत्रकारांनी खूब गजाली पळयल्यो की जाचेर आतांय चर्चा करूं येता. पक्षांतरां जाल्यार ह्या प्रांतांत पाचवेकूच पुजल्यात. आमदार फुटप, फोडप, उबारून व्हरप हातूंत गोंयचें नांव सामकें तेंगशेर आसा. अशा ह्या प्रदेशांत सगल्यां कडेन नाळ जोडून वावुरपी व्यक्तीमत्व म्हणल्यार दामू नायक. गोंयांत आयचे घडयेक डॉ. प्रमोद सावंत हांच्या फुडारपणा खालचें सरकार पुरायपणान थीर आसा हातूंत दुबाव ना. फुडारी बदलपाच्यो वावड्यो उठप हें कितें नवें न्हय. पूण नवे प्रदेशाध्यक्ष म्हूण दामू नायक हांची जापसालदारकी आतां आनीक वाडल्या. सरकारांतले कथीत विसंवाद पयस करपाचें काम तांकां करचें पडटलें. विधानसभा वेंचणूक अजून पयस आसा. ते खातीर पक्ष संघटणा तयार दवरपा खातीर तांकां पावलां उबारचीं पडटलीं. तळागाळांतल्या कार्यकर्त्यांच्या खांदार हात दवरून काम करून घेवप हें दामू नायक हांचे खातीर नवें न्हय. प्रदेशाध्यक्ष म्हणून लेगीत तांचे कडल्यान हीच अपेक्षा आसा. नवो दामू आयज परिपक्व जाला. दामू नायक हांकां आमच्यो शुभेत्सा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
