भांगरभूंय | प्रतिनिधी
सत्यम शिवम सुंदरा…! सुशिला सिनेमांतली ही अर्थपूर्ण प्रार्थना. ह्या ज्ञानमंदिराक म्हजो नमस्कार, शब्दरुपांची शक्त दी, भावरुपाची भक्ती दी. उदरगतीचीं पाखाटीं दी, विद्येचें धन दिवन म्हजें व्हडें पलतडी व्हर, आमी नीतीमंत जातले, कलागुणी, बुद्धीवंत जातले…आमचे आनी शाळेचे किर्तीचो कळस मळबाक तेंकू दी…..!, असो हे प्रार्थनेचो आशय. शाळा हें पवित्र थळ. आमचें व्यक्तीमत्व सुदारपी, भावविश्व गिरेस्त करपी, आमकां पोटाक लावपी शाळेचे बाबतींत कोणेच पडमूर जावंक फावना. पूण, कांय जाणांची बुद्द घडये पांयांचे खोंटेंत आसुये. बौद्धीक दिवन, उपदेश करून ते सुदारनात. ख्यास्त जावन पसून तांकां आपणें जें कितें केलें ती चूक दिसना. दिवचलच्या शांतादुर्गा उच्च माध्यमीक विद्यालयाचें नांव घाणावपाचो यत्न तातूंत शिकपी कांय विद्यार्थ्यांनीच केलो, हाका कितें म्हणचें?
बिरेस्तारा दनपरां अचकीत कांय चलयो दुयेंत पडल्यो. तांकां स्वास घेवपाक त्रास जावपाक लागलो. बेगोबेग अॅम्ब्युलन्सी आपोवन तांकां हाॅस्पिटलांत व्हेलीं. चड दुयेंत आशिल्ल्यांक म्हापश्यां, एकल्याक पणजे जीएमसींत व्हेलें. दुयेंत पडपाचें कारण पेपर स्प्रे. (मिरयांचो स्प्रे, जो देशाच्या कांय वाठारांनी तवनास तरणाट्यां पसून स्वताक वाटावपाक चलयो वापरतात. फाटीं आसगांवां अपहरणा वेळार एकलेन वापरिल्लो.) कांय वैजकी जाणकारांच्या मतान, पेपर स्प्रेचो इतलो भिरांकूळ परिणाम जायना. म्हणटकूच, दिवचले वापरलो तो पेपर स्प्रे काय आनीक कसलें रसायन हाचो सोद पुलिसांक घेवचो पडटलो. आतां विद्यालय आनी सरभोंवतणी आनीक सीसीटीव्ही कॅमेरे बसयल्यात. ताका लागून कोण विद्यार्थी वा थंय येवपी नागरीक आजनेरी, मस्तीपणां करतात जाल्यार कळटलें. निदान ह्या कॅमेऱ्यांच्या भंयान तरी हे प्रकार बंद जावचे.
स्प्रे प्रकरणांत पांच विद्यार्थ्यांक एका म्हयन्या खातीर निलंबीत केल्यात. तातूंत एक चली आसा, ही धपको दिवपी गजाल. कारण चलयो असल्या प्रकारांनी सहसा नासतात. चलयां वयल्यान शाळा, म्हाविद्यालयांनी केस्तावां जातात, पूण चलयो मारामारी पसून चार हात पयसूच रावतात. आतां काळा वांगडां चलयो बदलूंक नात मूं? एका निलंबीत विद्यार्थ्या कडेन कांय दिसां पयलीं ई- सिगारेट मेळिल्ली खंय. तातूंत द्रव पदार्थ दवरलो काय तो वाफेंत रुपांतरीत जाता. ताचेर 2019 त सरकारान बंदी घाल्या. पेपर स्प्रे (?) मारपाचो प्रकार फाटल्या शुक्रारा 11 आॅगस्टाक जाल्लो. कोणाक चड कांय जावंक ना. तवनास तरणाट्यांची मस्ती, फकांडां आसतलीं, म्हूण घडये शिक्षकांनी ती घडणूक वयलेचाराक घेतली आसतली. मात बिरेस्तारा जालें, तें हुस्को करपा सारकें. कोणाक कितें जाल्लें जाल्यार विद्यालयाक तें कितल्याक पडपाचें? हे पांच विद्यार्थी शाळेंत शिकपाक वतात काय हिरोगिरी करपाक! तरणाटे पिळगेचेर सिनेमाचो प्रभाव आसताच. हिरो, हिरोयन करता म्हूण आपूणय तशेंच करचें, अशें खूबशा जाणांक दिसता. मागीर ते त्रासांत पडटात वा मानसीक तणावा खाला येतात. डिप्रेशनांत वतात. शाळेंत, म्हाविद्यालयांत शिकपा खातीर वचपाचें आसता. शिकून बरी नोकरी मेळची, सारासार विचार करपाची बुद्द मेळची, ज्ञान मेळचें, व्यक्तीमत्वाचो विकास जावचो, खेळ आनी हेर कलागुणांची उदरगत जावची हे खातीर शाळेंत वचपाचें. खूब खेळपाचें, वाचपाचें, पळोवपाचें… प्रामाणीक, समाजसेवी जावपाचें. शाळा हो मस्तेपण करपाचो जागो न्हय. काॅलेजींत पावल दवरलें काय आपूण आतां भुरगो उरूंक ना, हाचे मुखार हांव जाय तें करपाक मेकळो, असो कांय जाणांचो गैरसमज आसता, तो पयस जावप गरजेचें.
स्प्रे मारपाच्या प्रकारा फाटलें नेमकें कारण सोदपाक जाय. सगल्याच म्हाविद्यालयांनी आयज जुंवानपणाच्या हुंबऱ्यार उबे आशिल्ले भुरगे मस्तेपणां करतात. दोन गटां मदीं झगडीं जातात. दांडे पसून घेवन झगडपाचे प्रकार 1980 च्या दसकांत जाल्यात. प्रेमप्रकरणा वयल्यान बाचाबाची, झगडीं हीं सदचींच…. आनिकूय खूब कितें जाता! हो स्प्रे काय आनीक कितें मारलें, तें चलयांचेरूच कित्याक मारलें? तेंवूय बी अमूकच क्लासींतल्या? 11 तारखेक आनी पयर बिरेस्तारा स्प्रे मारपी तेच भुरगे आशिल्ले काय दुसरे? ह्या चार चल्यांचें आनी चलयेचें म्हाविद्यालयांत आनी भायर वागप कशें आसा? पुलीस सगल्या प्रस्नांच्यो जापो सोदतलेच. पूण कारण नासतना म्हाविद्यालयाचें वेवस्थापन, दुयेंत जाल्लीं 12 भुरगीं, निलंबीत केल्ले पाच विद्यार्थी, ह्या 17 जाणांचे पालक, शिक्षक, कुटुंब हांकां कितलो मनस्ताप जाला आसतलो?
विद्यालय म्हणजे विद्येचें देवूळ. ते देवूळच रावुंदी. आमच्या करण्यांनी ताका वेगळें कसलें तरी रूप दिवया नाका. हेर म्हाविद्यालयांच्या विद्यार्थ्यांनी ह्या प्रकरणा पसून बोध घेवचो आनी आपापल्या विद्यालयांक सत्यम शिवम सुंदराचें रुप दिवपाचो यत्न करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
