सगलो संवसार सुखी जावचो

भांगरभूंय | प्रतिनिधी

देवा कांय लोक आपणाले जाणटे पिरायेर नातवां वांगडा वेळ घालोवचो सोडून नाका आशिल्लीं कामां करूंक लागल्यात. गोंयकारां मदीं भाशा आनी लिपयेच्या नांवांन धोशी घालूंक लागल्यात. देवा तांकां मात्शी बरी बुद्द दी.

हे देवा महाराजा, गणराया सगल्या संवसाराचेर तुजी पूर्ण कृपादृश्टी आसूं दी. आज चवथ. दर वर्सा लोक उमेदीन आयचो हो सण मनयतात. दर वर्सा ते तुजी वाट पळयत बसतात. देवा चवथी निमतान तुजें आगमन जाता. दर एका घरांत तूं आसतलो. कांय कडेन देड दीस तर कांय कडेन पांच, सात, णव, इकरा दीस तूं रावतलो. एक दोन जाग्यांचेर तर तुजी एकवीस दीस सेवा चलतली. आतां खंय कितले दीस रावप हें तुवेंच थारावपाचें. जाय तितले दीस तूं राव आनी जितले दीस म्हणून तूं रावतलो तितलेय दीस लोकां कडल्यान वेवस्थीत तुजी सेवा करून घे महाराजा.
देवा, सद्याक म्हारगायेन सगल्यांक नाका केलां. नाल्ल म्हणटात तो गोंयकारांच्या जिविताचो एक वांटोच म्हणल्यार जाता. तांदूळ आनी नाल्ल आसले बगर गोंयकारांचें जेवण जायना. तुजे सेवेकूय नाल्ल गरजेचो. ताका श्रीफळ बेठेंच म्हणटात तर? दर एका कार्याक श्रीफळ दवरून गणेश पुजा बांदची आसता. पूण देवा आमच्या सरकारान माड हें तण म्हणून जाहीर केलें आनी लोकांनी ताका पाळो दिवन सगलें तण कापून उडयलें. आतां पयलीं वरी माडाचीं भाटां नदरेक येनात. वचत थंय काँक्रीट रानां मातिल्लीं दिसतात. मागीर नाल्ल खंयच्यान मेळटलो? श्रीफळूच नासल्यार श्रींची पुजा कशी जातली?
तातूंत जे माड उरल्यात तांकां माकड पिडटात. ते आडसरांच फोडून खातात. तांकांय माड म्हणजे तण दिसलां आसूंक जाय. देवा ह्या सगल्या माकडांचो बंदोबस्त तुजे बगर कोण करतलो? जें गोंय एका काळार नाल्लांनी गिरेस्त आसलें त्या गोंयांक आतां कर्नाटक वा केरळच्या नाल्लाचेर पातयेवन रावपाची पाळी आयल्या देवा. दर तर मळबाक तेंकल्यात. हें जर अशेंच उरलें जाल्यार सामान्य लोक तुजी सेवा कशी करतले, महाराजा? देवा तूं सर्वज्ञ. ह्या संवसारांत तुजे मान्यताये बगर एक पान सुद्दां हालना म्हणटात. म्हणटकूच तुका हें सगलें खबर आसतलेंच तरी ह्या म्हारगायेक बी तुजी मान्यताय आसतली अशें दिसना. तरी आसतना हें सगलें कशें घडटा देवा?
सद्याक गोंयांत कितें चल्लां तेंच कळना जालां देवा. गोंय आतां गोंयकारांच्या हातांत उरूंक ना. गोंयांत नवे गोंयकार भरल्यात जे आपणाली संस्कृती वांगडा घेवन आयल्यात. दर दिसा कोणे तरी कोणाक तरी मारलो, कोणाचेर हल्लो जालो, खंय तरी फारपेट जालो, कोणाचेर आगळीक जाली ह्योच गजाली आयकूंक मेळटात. एका काळार ह्याच गोंयांत येवन दुर्गा लेगीत शांत जाली आनी शांतादुर्गा जावन रावली म्हणपाचें जाणटेले सांगताले. आयज हे लोक शांत कशे जायनात काय? तांची खुनशीपणाची संस्कृती कशी वचना काय? देवा हाचेर तुवेंच उपाय काडचो पडटलो. गोंय पयलीं वरीच शांत उरतलें म्हणपाचें तुवें पळोवचें पडटलें.
देवा गोंयच्या रस्त्यांचेर दर दिसा कोणाचो तरी बळी गेलो म्हूण आयकूंक येता. रस्त्याक रगताची चटक लागल्या काय मनशाक जीव चड जाला तेंच कळना जालां. आयच्या तरणाट्यांक वेगाचें इतलें पिशें लागलां जाका लागून तांचो आपणाचेर ताबो उरना. भायर सरिल्लो मनीस घरा पावतलोच हाची खात्री आसना. देवा हे अपघात आळाबंदाक हाडूंक जाय. देवा गोंयचो तरणाटो ड्रग्साचे भकीक पडटा. ताका तातूंतल्यान पयस करूंक जाय. तूं बुद्धिदातो. तुवेंच सगल्यांक बरी बुद्धी दिवन हातूंतल्यान तारपाचे देवा. हे भुरगे देशाचें भविश्य. ते अशे फुकेसवाय पेड्ड्यार जावंक दिवंक जायना देवा.
देवा कांय लोक आपणाले जाणटे पिरायेर नातवां वांगडा वेळ घालोवचो सोडून नाका आशिल्लीं कामां करूंक लागल्यात. गोंयकारां मदीं भाशा आनी लिपयेच्या नांवांन धोशी घालूंक लागल्यात. देवा तांकां मात्शी बरी बुद्द दी. आयकनाच जाल्यार बुद्द शिकय पूण गोंयकारां मदीं फूट पडची ना हाची जतनाय घे देवा. गोंय आनी गोंयकारांनी भाशे खातीर खूब सोंसलां. कितलशेच दिसांचें झूज मारून तांणी भास जाग्यार घाल्या. तांचेर आनीक रस्त्यार येवपाचे प्रसंग हाडूं नाका देवा. गोंयकारांक सुसेगादीन जगूंक मेळटलें इतलेंच पळय देवा.
देवा गोंयच्याच न्हय तर पुराय संवसाराच्या लोकांक सुसेगादीन जगूंक मेळूं दी. तो ट्रंप सद्याक नाका आशिल्लें करूंक लागला. ताका नोबॅल शांती पुरस्कार पिडूंक लागला. कसोय तरी तो मेळोवंक जाय म्हूण तो एकेक नाडेपेन्न करीत आसा. पयलीं खंय तरी कीट पेटोवन उजो लावपाचो आनीक मागीर तो आपणे पालयलो म्हूण दाखोवपाचीं नाटकां तो करूंक लागला. भारताचेरूय तो बरोच बेजार आसा. ताका आमचो देश वयर सरता तें पळोवंक जायना. आपूण भारताचो इश्ट इश्ट म्हणटनाच तो भारताक आपलो दास करूंक सोदता. भारतान खंयच्यान सामान घेवचें आनी खंयच्यान घेवचें न्हय तें तो थारावंक सोदता. आमचे फुडारी आपणालें आयकना म्हूण तो भारताचेर टॅरीफ लावपाची भास करता. देवा ताचे तकलेचो मात्सो बेगीन इलाज कर नासल्यार तो पुराय संवसाराक छळूंक फाटीं फुडें पळोवचो ना.
देवा त्या गाझा पट्टेंत जें चल्लां तें सारकें न्हय. थंय जाता तितले बेगीन शांती हाडपाचो यत्न कर. ह्या झगड्यांक तशेंच रशिया आनी युक्रेन झुजाक लागून सामान्य मनशाक खूब त्रास जातात देवा. ह्या झगड्यांक लागून लाखांनी कुटुंबां वाऱ्यार पडल्यांत. उपासमारीन लोक मरूंक लागल्यात. देवा झुजान सगल्यो समस्या सुटनात म्हणपाचें ह्या फुडाऱ्यांचे तकलेंत घाल. कांय जाणांच्या सुवार्थाक लागून अख्खो संवसार त्रासांत पडटा हाची जाणविकाय ह्या लोकांक करून दी देवा. युद्ध न्हय तर बुद्ध संवसारांत येवचो आनी सगलो संवसार सुखी जावचो इतलीच प्रार्थना तुजे लागीं करतां देवा. सर्वेजना सुखी नो भवंतू.

अभयकुमार वेलींगकार
9423884687