भांगरभूंय | प्रतिनिधी
भांगरभूंय। प्रतिनिधी
पणजीः सगल्यांनी एकठांय येवंन केल्ल्या यत्नांतल्यान पर्यावरण पूरक अशी शाश्वत उदरगत करप शक्य आसा, अशें मत पर्यावरण मंत्री ऑलेक्स सिक्वेरा हांणी बिरेस्तारा पणजे जाल्ले दुसरे आंतरराष्ट्रीय पर्यावरण आनी शाश्वतताय परिशदेच्या उक्तावणा वेळार उक्तायले. ह्या वेळार आदलो केंद्रीय मंत्री सुरेश प्रभू, प्रदूशण नियंत्रम मंडळाचो अध्यक्ष महेश पाटली, वांगडी सचीव शर्मिला मोन्तेरो आनी हेर पदाथिकारी हाजीर आशिल्ले.
शाश्वत उदरगती खातीर सरकार यत्न करत आसा. मात तातूंत साबार लोकांनी लेगीत वांटेकार जावपाक जाय. लोकांनी स्वता फुडाकार घेवन पर्यावरण दूत जावपाक जाय. आमची सगल्यांची ही जापसालदारी आसा. तशें केल्यारूच पर्यावरणाची राखण करून पांचवीचार पृथ्वी करप शक्य जातलें अशे सिक्वेरान फुडें उलयतना सांगलें.
सुरेश प्रभू हाणे सांगलें की देशांत प्रदूशण नियंत्रण मंडळ स्थापन करून सुमार 58 वर्सा जाल्यांत. मजगतीच्या तेपार लोकसंख्या वाडून पर्यायान प्रदूशण व्हडा प्रमाणांत जावपाक लागलां. दरेक व्यक्ती प्रदूशणांत वाड करता अश्या वेळार सगल्या राज्यांतल्या प्रदूशण नियंत्रण मंडळांनी फकत नियंत्रणाचे काम करीत रावपा परस फुडलो विचार करपाक जाय. फुडाराक कसल्यो उपाय येजवण्यो करपाक जाय हाचेर खोलायेन विचार करून निर्णय घेवपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
